ستار ئەحمەد
نووسەر، کەرکووک
نیشتمان تەنیا چەمکێکی جوگرافی نییە کە بە سنوورە دەستکردەکان و هێڵە کێشراوەکانی سەر نەخشە دیاری کرابێت، بەڵکوو قەوارەیەکی زیندوو و ڕۆحێکی بەردەوامە کە لە ناخی ویژدانی هەر تاکێکی ئازادیخوازدا لێدەدات. کاتێک باس لە نیشتمان دەکەین، لە ڕاستیدا باس لەو ڕەگ و ڕیشە قووڵە دەکەین، کە لە قووڵایی مێژووەوە سەرچاوەی گرتووە و بەناو ڕووداوەکاندا تێپەڕیوە تا بگاتە ئاسۆی گەشی داهاتوو. بۆ ئێمەی کورد، نیشتمان ئەو ئارامگەیە کە شکۆی تێدا لەدایک دەبێت؛ ئەو ئامێزە میهرەبانەیە کە تێیدا مرۆڤ هەست بە ناسنامە و بوونی ڕاستەقینەی خۆی دەکات. بێ نیشتمان، مرۆڤ وەک گەڵایەکی وەریوی بەر دەم ڕەشەبا وایە، کە هەرچەندە بگەڕێت، شوێنێک شک نابات بۆ ئەوەی تێیدا پشوو بدات و ئابڕووی مرۆیی خۆی تێدا بپارێزێت. هەر بۆیە، خۆشەویستیی ئەم خاکە پێویستە لە هەستێکی سۆزداریی کاتییەوە ببێتە فەلسەفەیەکی ژیان و مانیفێستێکی کارکردنی بەردەوام.
لە ڕوانگەیەکی فەلسەفییەوە، نیشتمانپەروەری باڵاترین جۆری لایەنگیرییە. ئەگەر سەیری مێژووی گەلان بکەین، دەبینین ئەو نەتەوانەی توانیویانە شارستانییەتێکی مەزن بونیاد بنێن، ئەوانە بوون کە نیشتمانیان وەک پیرۆزترین ناوەند بۆ داهێنان و پاراستنی بەها مرۆییەکان بینیوە. نیشتمانپەروەریی ڕاستەقینە تەنیا لەوەدا کورت نابێتەوە کە بە دروشمی بریقەدار و وەسفی جوانیی سروشت یادی بکەینەوە، بەڵکوو لەوەدایە کە چۆن دەتوانین ئەم خاکە بکەینە لانکەیەک بۆ دادپەروەری، پێکەوەژیان و گەشەی زانستی. ئەرکی هەر نووسەر، ڕۆشنبیر و هەر تاکێکی کۆمەڵگە ئەوەیە کە بە کردەوە بیسەلمێنێت ئەم نیشتمانە شایستەی ئەوەیە جوانترین و پڕشکۆترین ئارامگە بێت. ئەمەیش تەنیا بە پاراستنی سێکوچکەی (زمان، کولتوور، و مێژوو) دەبێت، چونکە کاتێک نەتەوەیەک زمانی دایکی و ڕەسەنایەتیی خۆی فەرامۆش دەکات، لە ڕاستیدا کلیلی شکۆی خۆی ڕادەستی نامۆکان کردووە.
لە لایەکی ترەوە، ڕەهەندی مێژوویی نیشتمان بۆ ئێمە پڕە لە وانەی قورس و پڕ لە قوربانیدان. خوێنی ئەو هەزاران تێکۆشەرەی کە خاکی کوردستانیان پێ ئاودراوە، تەنیا ڕووداوێکی مێژوویی نییە، بەڵکوو پەیماننامەیەکی ئاکارییە لەسەر شانی ئێمە. هەر بستە خاکێکی ئەم نیشتمانە، گێڕانەوەی چیرۆکی خۆڕاگرییەکە لە بەرامبەر سڕینەوە و ڕەتکردنەوە. بۆیە پاراستنی نیشتمان وەک ئارامگەی شکۆ، وەفادارییە بۆ ئەو ڕابردووە پڕ لە ئازارە.
ئەمڕۆ کە لە سەردەمی تەکنەلۆژیا و جیهانگیریدا دەژین، نیشتمانپەروەری واتا و ڕەهەندی نوێی وەرگرتووە. ئێستا پاراستنی نیشتمان لە ڕێگەی بەهێزکردنی ژێرخانی ئابووری، بەرزکردنەوەی ئاستی پەروەردە و پاراستنی ژینگە دەبێت. نیشتمانێک کە ڕۆڵەکانی تێیدا خاوەن زانست و مەعریفە بن، هیچ هێزێک ناتوانێت شکۆی تێکبشکێنێت.
پێویستە ئەوەێش بڵێین کە ئاوەدانکردنەوەی نیشتمان پرۆسەیەکی بەکۆمەڵە و پەیوەستە بە یەکڕیزیی نێوان هەموو چین و توێژەکانەوە. نیشتمانێک کە تێیدا بەرژەوەندییە تەسکەکان جێگەی دڵسۆزیی نیشتمانی بگرنەوە، هەمیشە لەبەردەم مەترسیدایە. ئێمە وەک گەلی کورد، لە هەر نەتەوەیەکی تر باشتر دەزانین کە نیشتمان چ چەترێکی گەورەیە بۆ پاراستنی ژیان و کەرامەت. کاتێک دەڵێین نیشتمان ئارامگەی شکۆیە، مەبەستمان ئەوەیە کە تەنیا لەژێر سایەی ئەم خاکەدا دەتوانین بە سەربەستی گەشە بکەین و داهێنان بکەین. بونیادنانی نیشتمان لە خێزان و قوتابخانەکانەوە دەست پێ دەکات؛ کاتێک منداڵەکانمان فێر دەکەین کە پاراستنی درەختێک، پاکڕاگرتنی شەقامێک و ڕێزگرتن لە یاسا، باڵاترین جۆری خۆشەویستییە بۆ خاک، ئەو کاتە دەتوانین بڵێین بەرەو ئایندەیەکی گەش هەنگاو دەنێین.
لە کۆتاییدا، دەبێت ئەو ڕاستییە تێبگەین کە نیشتمان لە هەریەکێک لە ئێمەوە دەست پێ دەکات. نیشتمان بە دروشم ئاوەدان نابێتەوە، بەڵکوو بە ڕەنج، زانست و دڵسۆزیی بێپایان گەشە دەکات. هەر هەوڵێک بۆ چاکسازی، هەر وشەیەک کە بۆ ڕاستی و مرۆڤایەتی دەینووسین، و هەر هەنگاوێک کە بۆ خزمەتی گشتی دەینێین، بەردێکە لەو دیوارە بەرزەی کە شکۆی نەتەوەکەمانی پێ دەپارێزرێت. با هەموومان بەیەکەوە کار بکەین بۆ ئەوەی کوردستان نەک هەر شوێنی نیشتەجێبوون بێت، بەڵکوو ببێتە ئەو مەڵبەندە پڕ لە مەشخەڵەی ،کە مرۆڤی تێدا بە ئازادی و سەربەرزانە دەژی. وەفاداری بۆ ئەم خاکە، ئەمەکدارییە بۆ خود و بۆ ئەو مێژووەی کە هیچ کات پشت لە ڕۆڵە دڵسۆزەکانی ناکات. نیشتمان ئەمانەتێکی پیرۆزە، با بەو پەڕی شکۆوە بیپارێزین و بیدەینە دەست نەوەکانی داهاتوو.
