دێرین جەمال
نووسەر، سلێمانی
……………………….
ئەگەر پەرچوویەک ڕووبدات،
خودا داوایەکم بێنێتە دی..
داوا دەکەم ،تەنیا بمباتەوە،
بۆ سەردەمی منداڵی!
بەڵێن دەدەم،
منداڵێکی زۆر سالار بم،
لە خوێندندا،
شێری پۆل و ئازا بم،
نایدڕێنم .پەرتووکی قوتابخانە،
نای ڕەنجێنم ،
دڵی هاوڕێیەک بێباکانە،
لەسەر بووکەشووشەکەم،
شەڕناکەم، لەگەڵ خوشکم،
ئێوارەش وەختی بانگ ،
کاتی نانخواردن،
ڕادەکەم پێش دایکم،
سفرە ڕا دەخەم بێ وڕکگرتن
لای دەرگای حەوشە ،
چاو لە کۆڵان ئەوەستم
دەزانم وەختی هاتنەوەی باوکمە،
وەک پەیکەر ڕائەوەستم،
ئەو ساتەی کە ئێواران،
خۆر ڕوو لە ئاوابوون دەبێت،
بە هاتنەوەی باوکم،
خۆر لە ماڵی ئێمە هەڵدێت!
بەڵام داخەکەم!
ئەمە یاسای ژیانە،
مەگەر هەر بە خەون و خەیاڵ،
بیبنم ئەو ساتانە…
