دەریــــا خۆشناو
نووسەر و شاعیر
نەرویج
………………..
ئەی تۆ دەریـــــا نەبوویت..؟
هاودەمی مەندیی و ئارامیی نەبوویت؟
کەناری دنیات داوەتە بەر شەپۆل و پێ ی نازانیت
کە تۆ هەوێنی ئەوین و سەبوورییم بوویت!
سەرت هەڵگرتووە، بۆچ ناسرەوی،
بۆچی ئامان و سرەوتت نیە
چ داخێکە بەسەر دڵتەوە،
کەوا ئاهەکانت فرمێسکن و
زامەکانت هیچ ئۆقرەی نیە!
خۆزگە دڵی بێ قەرارت جارێک هێور ئەبۆوە
خەوم بۆتە ڕامان، و خۆراکم بۆتە پەرێشانی
هاوڕازت بووم پەنام دابوو دەردی دڵت
ئەی ئێستا کە تۆ دەردی دڵی منی
من چی بکەم، لە هەموو شتێ ڕاماوم،
دەستە و ئەژنۆم، بەجارێ گرفتار و داماوم!
٧/٧/٢٠٢٣
