.
نه‌ژاد عزیز سورمێ
نووسەر، هەولێر
………………….
(تاریكایی لوتكه و به‌نده‌نی داپۆشین ،
بروسكه‌یه‌ك دره‌وشایه‌وه‌و
ئاگرێ هه‌ڵبوو،
دونیا مه‌رگی باراند ،
هه‌رچی ده‌كه‌وت، ده‌بووه خۆڵه‌مێش
داستانی گه‌لگامش )
(1)
/ ڕێژنه‌یه‌ك/ له/ نیوه‌شه‌ودا/ خه‌ونی/
/ له‌بیر/ بردمه‌وه/ نمه‌یه‌ك/ به‌بیری/ هێنامه‌وه/
/ له‌نێوان/ له بیرچوونه‌وه و/ وه‌بیرهاتنه‌وه‌دا/ له‌گه‌ڵ/
/ ئاوازه/ شه‌كه‌ته‌كانی/ سرووشتدا/ تێكه‌ڵ/ بووم/
په‌لكه‌گیای ته‌نیا ،
به‌ئاوی كڕدا ده‌چن ..
شه‌قامی ئه‌ستێران ،
چه‌ند مه‌ترێ هه‌ناسه و
تاوێ بارانی ده‌وێ ..
شه‌قامی ئه‌ستێران ،
باجی خه‌رمانه و ڕۆژلێبڕان ده‌خوازێ.
(2)
/ ئاسان/ نییه/ له/ نه‌زمی/ هه‌ڵبوون/ بگه‌ین/
/ ئاسان/ نییه/ شاره/ مێرووله‌یه‌ك/ له/ نیشتمانی/
/ ئاسانستاندا/ دڵنیا/ بكه‌ینه‌وه./
خۆت به یه‌كته‌نی و بێنیازی بسپێره…
تارمایی دره‌ختان له ته‌مدا
چه‌ند جوانه،
چه‌ند شۆخ..
با ئیتر بگه‌ڕێـیـنه‌وه
با بگه‌ڕێینه‌وه په‌یكی له‌شان و پیل كه‌وتوو!
ئێمه خه‌ریكه ده‌گه‌ینه
ئاسۆی ئاڵووده‌یی.
بابگه‌ڕێینه‌وه
خۆمان به یه‌كته‌نی و بێنیازی
بسپێرین ..
(3)
/ گه‌ره‌كه/ قه‌سیده/ قه‌ڵمڕه‌وی/ به‌هه‌شت/ بێ/
/گه‌ره‌كه/ زمانمان/ له/ وه‌رزه‌كانی/ زیاتر/
/ لێ/ به‌وه‌له‌د/ بێ../
/ گه‌ره‌كه/ مانگمان/ له/ هه‌رێمی/ دره‌وشانه‌وه/
/ ئاوا/ نه‌بێ/ ئاسمانمان/ بێـگه‌رد…/
من بۆیه ده‌ڵێم چاوی دڵ
چاوی دڵ ،
ئه‌زه‌له، ئه‌زه‌ل.
بۆیه ده‌ڵێم چرای ڕاز
چرای ڕاز ،
كوانووی
هه‌ڵوه‌دایانه ، چرای ڕاز.
ئامان ژه‌نگاری په‌تیاره‌یی
ئامان!
(4)
/ دادپه‌روه‌ری/ له/ وشه‌دا/ نیییه/ دادپه‌روه‌ری/
/ له/ پیتدایه/
/ ئه‌ندێشه‌ی/ دوابڕاو/ پڕشنگ/ ئه‌دا./
/ نیوه‌شه‌و/ شه‌رابـێـكی/ سپی/ بوو/
/ ئێمه/ به/عه‌كسی/ شه‌راب/ له/ پیتێـك/
/ ده‌گه‌ڕاین/ پیتێـكی/ چارۆگه‌دار/ لاسه‌نگی/
/ هاوسه‌نگ/ بكاته‌وه/
/ ئێستایش/ ده‌گه‌ڕێین../
ده‌رگای ئومێد ،
به‌كلیكی بێئومێدی ناكرێته‌وه .
شاباش بۆ ئه‌و گڕه‌ی دونیای سووتاند
دڵ باكی پێ نه‌بوو!
شاباش بۆ پاسه‌وانی
مه‌مله‌كه‌تی ته‌نپۆڵایی و ده‌رفه‌ت ..
(5)
/ په‌یامی/ بێهووده‌یی/ هه‌ندێ/ جار/ گه‌وهه‌ری/
/ لێ/ ده‌رده‌كه‌وێ/ وه‌ك/ ئه‌و/ مۆته‌كانه‌ی/
/ له/ بێداربوونه‌وه‌دا/ به/ زیندوویی/ لێـیان/
/ ئازاد/ ده‌بین./
له‌باران به‌هره وه‌رگره !
سۆزی مه‌ستیی لێ ده‌تكێ .
ڕووه خه‌مباره‌كان ،
به‌لای خه‌راباتان وه‌رده‌گـێڕێ.
سه‌هه‌ندی پشكۆ!
نهێنی ئه‌و چاوانه‌ی ،
عاشقیان تێدا ده‌توێنه‌وه ..
شێتیان له ناودا ون ده‌بن ..
ئای باران!
شایه‌دی دوورونزیك
دوا په‌یمانه‌مان به به‌تاڵی مه‌ھێـڵه‌وه.
(6)
/ په‌لكه‌زێڕینه/ ده‌بینم/ بڕوام/ به/ به‌رپابوونه‌وه/
/ له‌ق/ ده‌بێ/
/ نازانم/ ده‌توانی/ مانایه‌ك/ به/ غه‌فڵه‌تی/
/ شه‌وه‌زه‌نگ/ بده‌ی/؟/
/ نازانم/ ده‌توانی/ ئه‌و/ زه‌مه‌نه/ ڕابگری/
/ داگیركه‌رانی/ زه‌مه‌ن/
/ ئاو/ و/ هه‌وایان/ لێ/ بڕیوه؟/
/ ده‌توانی/ بۆ/ ڕۆژگارێـكی/ دیكه‌ی/ هه‌ڵده‌ی؟/
ئه‌و هه‌ناسه‌یه چییه
نوقمی گێژه‌نه،
نه ده‌خنكێ ، نه ڕزگاری ده‌بێ؟!
ئه‌و دڵه چ دڵێـكه
ده‌وه‌ستێ و له لێدان ناكه‌وێ؟
ئه‌و مۆمه چییه
تا ئه‌به‌د ده‌سووتێ؟
تۆ دووری ، ئه‌ی پرسیاری ناخ
داد نییه
به تۆ گه‌یشتن
له كێوی قاف
دوورتر بێ.
(7)
/ سیڕه‌ی/ ده‌رگا/ له/ غه‌ریبیدا/ ئاهه‌نگێـكی/
/ ئه‌فسووناوی/ هه‌یه/
/ هاووڵاتییانی/ گه‌لگامش/ سه‌ریان/ له‌سه‌ر/
/ په‌یمانه‌یه‌ك/ دانا/ له/ ترسی/ ڕۆژگاره/
/ خۆڵه‌مێشییه/ دیماهینه‌هاتووه‌كان/
/ هه‌ڵبزڕكابوو../
بۆ تۆ، سه‌ر له‌ڕێ
كوێت بوێ ده‌چم ..
له‌م زه‌نه‌كه‌دا، به ته‌نیا
ناتوانی بپه‌ڕیه‌وه
تا، تا، تا،
تا (هه‌تاو له سنگمان ده‌ڕوێ)
له‌گه‌ڵت ده‌بم .
تا، تا، تا،
تا ئه‌م خاكه و خۆڵه مابێ،
بۆ تۆ
سه‌ر له ڕێ
كوێت بوێ ده‌چم.
(8)
/ مێژوومان/ وێنه‌ی/ قه‌سیده‌یه‌كی/ نیوه‌چڵ/
/ له/ كۆڵدا/ هاتووه/ ته‌بعی/ په‌ژمورده‌یی/
/ خه‌ره‌ندێكی/ هه‌زار/ به/ هه‌زاره/ به/ به‌ر/ چاوی/
/ ئاده‌مییه/ سه‌ر/ هه‌تاوه‌كانه‌وه/ هه‌ڵمانده‌لووشێ/
/ ده‌بێ/ نه‌هێڵین/ ئه‌و/ ڕوناهییه، بكوژێته‌وه/
هه‌میشه ته‌سلیمی ئه‌و خه‌نده‌یه‌م،
له سیماتدا هه‌ڵدێ.
ئه‌و ده‌روێشانه ده‌بینم
به هه‌ڵاوی جوانی ده‌سووتێن.
بار له كۆنترۆڵ ده‌رچووه، كریڤ !
خه‌مسه‌رایه، خه‌مسه‌رایه، خه‌مسه‌را…..
ئه‌یلوولی/ 2013
