موژدە
زمانی کوردی ناسنامەی منە
(پرۆژەی گوتنەوەی زمانی کوردی بە منداڵانی دەرەوەی وڵات)
زمانی دایک بەشێکی هەرە گرنگ و بنەڕەتیی ناسنامەی مرۆڤە، گاریگەریی لەسەر گەشەکردنی مەعریفی و کۆمەڵایەتی هەیە و کلیلی میراتی فەرهەنگی و نەتەوایەتیی تاک و کۆمەڵە، هەروەها ئامرازی بەهێزکردنی باوەڕبەخۆبوون و کەسایەتیی مرۆڤە، بەتایبەتی ئەگەر ئەو مرۆڤە لە زێد و نیشتمانی خۆی هەڵکەندرابێت. زمانی دایک سەرچاوەیەکی گرنگە بۆ هێنانەکایەی فرەزمانی و فرەفەرهەنگی و تێگەیشتنی نێوان فەرهەنگە جوداکان.
لە ڕوانگەی هەستکردن بە بەرپرسیارێتیی نەتەوەیی و فەرهەنگی و بۆ ئەوەی منداڵانی کوردی دەرەوەی وڵات کە تا ئێستا بواری فێربوونی زمانی کوردییان بۆ نەڕەخساوە، لە فێربوونی زمانی کوردی بێبەش نەبن؛ پەخشخانەی سان لە وڵاتی سوێد ئەم پرۆژەیەی ئامادە کردووە و دەستبەجێ دەیخاتە بواری کارپێکردنەوە.
ناوی پرۆژە: پرۆژەی گوتنەوەی زمانی کوردی بە منداڵانی دەرەوەی وڵات
خاوەنی پرۆژە: پەخشخانەی سان
ماوەی پرۆژە: سێ ساڵ (بە ئەگەری زۆر درێژ دەکرێتەوە)
دەستپێکردن: نەورۆزی ئەمساڵ ٢٠٢٥
کێ سوودمەند دەبێت لەم پرۆژەیە؟
گرووپی یەکەم: منداڵە کوردەکانی ئەو وڵاتانەی کە دەوڵەت یارمەتیی گوتنەوەی زمانی کوردی نادات.
گرووپی دووەم: منداڵە کوردەکانی ئەو وڵاتانەی کە دەوڵەت یارمەتیی ڕێکخراوە فەرهەنگییەکان دەدات بۆ فێرکردنی زمانی کوردی، بەڵام سەرەڕای ئەوەیش پێویستیان بە یارمەتیی تر هەیە تاکوو کتێبی پێویست بۆ قوتابییان بکڕن.
گرووپی سێیەم: منداڵە کوردەکانی ئەو وڵاتانەی کە زمانی دایک لە قوتابخانەکانیاندا دەگوترێتەوە و دەوڵەت پارەی کتێب دابین دەکات، بەڵام پارەکە کەمە و جاری وا هەیە هەندێک لە قوتابییەکان کتێبیان بەر ناکەوێت.
گرووپی چوارەم: ئەو دایبابانەی دەیانەوێت لە ماڵەوە منداڵانی خۆیان فێری زمانی کوردی بکەن.
جۆری یارمەتی
بۆ گرووپی یەکەم: دوای دابینکردنی مامۆستای خۆبەخش لەلایەن ڕێکخراوە فەرهەنگییەکان یان دایبابانەوە و کردنەوەی پۆلی فێرکردنی زمانی کوردی، پەخشخانەی سان بە خۆڕایی کتێبیان بۆ دەنێرێت.
بۆ گرووپی دووەم: بە نیوەقیمەت کتێبیان پێ دەفرۆشرێت تاکوو ئەو پارەیەی وەریدەگرن، بەش بکات و هەر قوتابییەک کتێبی خۆی هەبێت.
بۆ گرووپی سێیەم: ئەو منداڵانەی کتێبیان بەر نەکەوتووە بەخۆڕایی کتێبیان پێ دەدرێت، بەمەرجێک بۆ منداڵانی تر ڕاستەوخۆ لە پەخشخانەی سانەوە کتێب بکڕدرێت.
بۆ گرووپی چوارەم: بە نیوەقیمەت کتێبیان پێ دەفرۆشرێت.
بوودجە: پەخشخانەی سان پەخشخانەیەکی بچووکە و توانای داراییی سنووردارە، بۆیە بەخۆشحاڵییەوە هەر کۆمەک و بەخششێک لەلایەن ڕێکخراوە هاوچەشنەکان، کەسانی خێرخواز، دامودەزگا فەرهەنگییەکان، وەزارەتی پەروەردەی هەرێم و وەزارەتی ڕۆشنبیری و لاوانەوە پێمان بگات، پێشوازیی لێ دەکەین و بەخۆشحاڵییەوە وەریدەگرین؛ بە داوای لێبوردنەوە یارمەتی لە هیچ حیزب و ڕێکخراوێکی سیاسییەوە وەرناگرین.
تێبینی: پەخشخانەی سان بۆ ئەم پرۆژەیە لە شوێنانی ترەوە کتێب ناکڕێت، بەڵکوو لەو کتێبانە سوود وەردەگرێت کە خودی پەخشخانەکە بۆ فێربوونی زمانی کوردی بە هەردوو زاری کوردیی ناوەڕاست (سۆرانی) و کوردیی باکوور (بادینی)، چاپی کردوون یان لەمەودوا چاپیان دەکات؛ وێنە و زانیاری لەسەر ئەو کتێبانەی ئێستا لە بەردەستدان لەم پۆستەدا هەیە.
پێوەندی:
outlook.com @sanforlag
yahoo.se@ fahmikakaee
Whatsapp: 0046707796923
یان لە ڕێگەی مەسنجەری ئەم فەیسبووکەوە.
پەخشخانەی سان
فەهمی کاکەیی
سوێد
٢١/٢/٢٠٢٥
