ساڵی ٢٠٢٥ پیرۆز بێت
چەند خولەکێکی دی ڕەنگە ئاڵوواڵاکانی یاری ئاگرین ئاسمانی تەواوی ئاوروپا دەتەنێ و، ماڵئاوایی ساڵێکی دیکەی غوربەتی و دوور لە نیشتیمان دەکەین، لە ساڵی دادێ ھیواکانی ئێمە وەک نووسەرانی تاراوگە زۆرن و گەرەکمانە خواستەکانمان باڵا پێ بدەین و ویستمانە پانتاییەکی فرە قۆرخ بکەین و دەنگ و ڕەنگ و قەڵەممان ببێتە ھەوینێ بۆ پێشکەوتن و گەشەکردنی ئەدەب و زمانی کوردی و فیدراسیۆنمان زیاتر جێ و پێگەی خۆی قایم بکات، لەم ساتەوەختە و لێرەوە لە گەڵ ڕەنگاڵەیی ئاسمان، پیرۆزبایی خۆمان لە تەواوی گەلی کوردستان بە گشتی و نووسەران و ئەدیبانی ھەر چوارپارچەی نیشتیمان دەکەین.
بە خولیا و مۆڕاڵی خۆرسکیانە و خاکەڕاییانە ھەنگاوەکانمان بەرەو تۆکمە کردنی فیدراسیۆنی نووسەرانی کوردستان – دیاسپۆرا و پاراستن و گەشەکردنی زمان و ئەدەبی کوردی دەنێین، بەو ھیوایەی ساڵی دادێ، ساڵی سازدانی یەکەمین کۆنگرەی فیدراسیۆنمان بێت و بێشەی غوربەت بکەینە دەروازەیەک بۆ ھەڵوەشاندنەوەی پەرتەوازەیی و لێک دابڕانی نووسەران و ئەدیبان و یەکڕیزی خودان قەڵەمی کوردستانیان لە ژێر سەیوانی فیدراسیۆنمان بە یەکگرتوویی ببینن.
ھەر لە جەژن و خۆشی بن و ساڵی دادێتان پیرۆز بێت
فیدراسیۆنی نووسەرانی کوردستان – دیاسپۆرا
٣١⁄١٢⁄٢٠٢٤
