رۆژانە سەد وشە دەنووسم

لەسەر کەنارە لماوییەکە خاولییەکەم لەتەنیشت پیاوێک ریش ماشوبرنج، باڵابەرز راخست، گیتاری دەژەنی، بەیۆنانیش منگەمنگێکی لەگەڵ دەکرد، لەگەڵ ئاوازەکەش شەپۆلەکان بەرەو دەنگەکە دەهاتن! بێدەنگ بوو، دەرەقەتی دەریاکە نەهات! هەنگاوێک کشایەوە، خەریکی قومە نەرمە تەڕەکە بوو، بەپەنجە درێژەکانی دەستکاریی لمەکەی دەکرد، وەک هەویر لەناو دەستی دەجووڵا.

زۆر هاتن! زۆر جەستەی نیمچە رووتی ژنان چوونە ناو دەریاکە، لەسەر لمەکەش لەسەرپشت راکشان، جاروباریش لاستیکە باریکەکەی سەرسمتیان دەگۆڕی. بەپەنجەکانیان وێنەی دڵیان دەنەخشاند، بەرلەوەی شەپۆلەکە بیانسڕتەوە، بۆ پۆستکردن وێنەیان دەگرت. بەڵام ئەو؛ هەر خەریکی لمەکە بوو، هەڵسایەوە دەستەکانی داتەکاند، پەیکەرەی دەرکەوت، چەند فۆتۆیەکی گرت. گیتارەکەی لەشانکرد؛ ماندووبوون، زەوق، هونەرە لماوییەکەی بە میوانی بۆ کەنارەکە جێهێشت، رۆیشت.