تێکست
هبە فەيسەڵ
نووسەر
جگە لە ئاشنابوونی دوو تێگەیشتن، دوو جەستە یان بە کورتی دوو مرۆڤ لە هەنگاوی گرنگی بەردەوامی ژیان کە بریتیيە لە پڕۆسەی هاوسەرگیری، جوانترین بەرهەمی ئەم ئاشنابوون و تێکەڵ بوونە لە پاڵ جوانیيەکانی دی، بوونی منداڵە.
بە پەرۆشيیەکی بێ ئەندازە دایک و باوک چاوەڕێی کۆرپەیەک دەکەن کە تیایدا خۆشەویستی، شانازی، میهرەبانی و هیوای ئێستا و داهاتویان بڕژێننە ناخیيەوە. هەر وەک وابێ و لەماوەیەکی کەم ئەم دوو مرۆڤە بۆ ئەو کۆرپەیە دەژین و لە گەورە و بچوکی نەخشەی ڕۆژانەیاندا خاڵێکی لەبیر نەکراوە.
ئیدی هیچ پڕۆژەیەک بەبێ هەنگاوی ئەو کۆرپەیە نەخشەداڕێژ ناکرێ. لە عەزرەتی خەمخۆری و دابینکردنی ژیانێکی دوور لە زەحمەت و بەڵا، دایک و باوک ملوانکەی ئارەزوو، خەون و چاوەڕوانی بۆ ئەو کۆرپەیە دەهۆننەوە و هەر لە ساوایەتیيەوە دەیکەنە گەردنی. جا موورو و زەنگیانەی ئەم ملوانکەیەيش بە پێی ڕەگەزی ئەو منداڵە دەگۆڕدرێ. چونکە ڕەنگ و قەبارە و سەنگینی ئەو موورو و زەنگیانانە، لە قوڵایی کۆمەڵگەوە دەرهێنراون. کەمیان دەبنە دەست کرد و هەڵبژاردەی دایک و باوک بە تەنها.
هەروادێ و دایک و باوک کوێرانە زەنگیانە بۆ ئەم خەناوکەیە زیاد دەکەن. لە بیریان دەچێ کە ئایا تا چ ڕادەیەک لەگەڵ تەمەن و ڕەنگ و حەز و بەرگی ئەم منداڵە ئەگونجێ. بیریان لەوە نیيە کە لەوانەیە ڕۆژێک بێت و ئە خەناوکە نازدارە مناڵەکەیان بخنکێنێ.
گرنگ و پێویستە کە دایک و باوک چاوەڕوانی و ئارەزوویان هەبێ بۆ داهاتووی مناڵەکانیان.بەلام دەبێ لەبەرچاویان بێ کە نەگاتە ئاستی فشار و پالپێوەنانێکی کوێرانە بۆ سەر مناڵ.
لە هەندێ گۆشە و پلەی ژیاندا مناڵ ناتوانێ بۆ نمونە لە هەفتەیەکدا بەشداری سێ چالاکی بکات و هەموویان بەیەکسانی و هەمان وزە بەجێ بهێنێ. یان لە قوتابخانە هەمان ئاست و پلەی قوتابیيەکی دی هەبێ. یان وەک دایک و باوکی پزیشک و قسەزان و بێشەرم و دەست ڕەنگین و سەنگین دەرچێ. کۆمەڵگەی تەندروست پێویستی بە هەموو جۆرە کار و مرۆڤ هەیە. ئاسوودەیی مرۆڤ بە قایل بوونی مرۆڤە بەخۆی. کاتێک هەست دەکات خۆشەویستە، یەکەمین لە خێزانی خۆیەوە کە دایک و باوک بە هەموو خواری و خراپیيەکانیەوە خۆشی دەوێ و پشتگیری بکا. نەک بە تانە و ناوەناتۆرە و بەراوردکردنی بە فڵان و ئەم و ئەو.مەگەر بیرمان چووە کە پەنجەکانی دەست لەیەکدی ناچێ، بەڕێزان
* مناڵ
پەروەردە*
دایک *
باوک *
داهاتوو *
خۆشەویستی
