كتێبی “سێبەری قەلەبەرد “
کتێبی تراجیدیای “کورد بوون”
د. نازناز محەمەد قادر/ نووسەر/ هەولێر
نووسەر “ خاتو مەلەکە” سەرەتا زۆر بە وردی ئاشنامان دەکات بە بنەماڵەی خۆی لە کوردستانی رۆژهەڵات لە لادێی “ ئەڵمانە” نزیک مەریوان، نزیک ١٨ خوشک وبرا ، بەری ٢ دایک ، زۆر بە بەختەوەری و میهرەبانی و رێز دەژیان…
سەرسام بووم بە رۆشنبیری بنەماڵەیەکی لادێی کە هەر زوو لە هەڕەتی لاوێتیدا تێکەڵ بە دنیای کتێب و هزر و ئەدەب دەبن
برا گەورەکەی کە یەک لە دامەزرێنەرانی رێکخراوی کۆمەڵە دەبێ ، لە سەردەمی شا پەهلەوی ٤ ساڵ بەند دەکرێت و لە زەمانی خومەینی دەکوژرێت…
لە ئەنجامی خەباتی شار و شۆرشگێری ٤ دانە برایتری لە ماوەی ساڵێکدا بەند دەکرێن و پاشان لە سێدارە دەدرێن.
“ مەلەکە” زۆر ئازایانە لە تەمەنی هەرزەکاریدا تێکەڵ بە سیاسەت دەبێت ، لە هەمانکاتدا کچێکی میهرەبان بۆ بنەماڵەکەی و بە هەموو ئەرکەکانی سەر شانی رادەگات…
هەر لە ئەنجامی خەباتی سیاسی شو بە کەسێکی هاوبیر و هاوڕێی خۆی و براکانی دەکات…
ئەنجامی ئەم هاوژینیە کچێک دەبێت بە ناوی “ بەیان”
، کارەساتباریی چارەنوسی “ بەیان” بۆ دایکی کەمتر نەبوو لە چارەنوسی پێنج برای….
دەتوانم بڵێم چی چیرۆکی تراجیدی کورد هەیە بەسەر “ مەلەکە” هاتوە و نازانم چۆن بەرگەی گرتوە؟!!
هەموو کوردێک پێویستە ئەم کتێبە بخوێنێتەوە ، چونکە پانۆرامایەکە لە ژیانی زۆربەمان…
دەتوانم بڵێم چی چیرۆکی تراجیدی کورد هەیە بەسەر “ مەلەکە” هاتوە و نازانم چۆن بەرگەی گرتوە؟!!
نووسەر هەوڵیداوە تیشک بخاتە سەر سترۆکتۆری چینەکانی کۆمەڵایەتی گوند و بارودۆخی سیاسی کوردستان لە دەیەی هەشتاکان و هاتنە سەر حوکمی مەلایان لە ئێران وهەروەها چالاکی رێکخراوە سیاسەکان و ناتەبایی نێوانیان و هەندێ لایەنی شەڕی براکوژی و زاڵبوونی عەقڵیەتی باوکسالاری ، تەنانەت لە ناو رەوتی چەپی کوردستان…
دوا بەشی کتێبەکە باس لە ئازاری غه ريبى و شۆکی کلتوری و لێک تێنەگەیشتن دەکات بە رادەیەک کە دەبێتە هۆی لەدەستدانی تاقە رۆلەکەی …
ئەم کتێبە شایانی ئەوەیە وەربگێردرێتە سەر هەموو زمانە زیندوەکانی جیهان ، بکرێت بە فیلم، “ مەلەکە” وەک سیمبولی دایک و خوشکێکی تێکۆشەری خۆراگرو ماندوی کورد پەیکەری لێ دروست بکرێت و لە داهاتودا لە پایتەختی هەرێمی کوردستانی رۆژهەڵات دابنرێ.
ئەم کتێبە شایانی ئەوەیە وەربگێردرێتە سەر هەموو زمانە زیندوەکانی جیهان
ناواخنی ئەم کتێبە هەوێن و سەرچاوەی زۆر لایەنی مێژویی و کۆمەڵایەتی و دەرونناسی تاک و کۆمەلگەی کوردستانە.
چارەنوسی کچەکەی بەهێزترین بەڵگەیە بۆ سەلماندنی نەخۆشی PTSD کە لە زۆربەی خێزانەکانی کوردستان دەبینرێ و تراوما بەرەو نەخۆشی و مەرگ بردونی..
تا سەربردەی “ بەیان” م تەواو کرد هەر گریام بۆ ئەو و برام پێشرۆ، کە هەمان چارەنوسی هەبوو و مانگی رابردو کۆچی دوایی کرد.
دامەزراوەیەک پێویستە بۆ لێکۆڵینەوە لە کاریگەریەکانی جەنگ و جینۆساید و ئاوارەیی و شۆکی کلتور لە سەر سایکۆلۆجیەت و کەسایەتی تاکی کورد.
