ئامادەکاری بۆ کۆنگرەی فیدراسیۆنی نووسەرانی دیاسپۆرا دەکرێت
سەردار جاف بۆ خەبات : ژمارەیەک نووسەری خۆبەخش لەژێر چەتری فیدراسیۆندا کۆبوونەتەوە بۆ خزمەتکردنی زمان و کولتووری کوردی
خەبات – ساسان دەروێش
چەند ساڵێکە بەهەوڵ و کۆششی کۆمەڵێک لە ڕۆشنبیران و نووسەرانی هەرچوارپارچەی کوردستان ، سەکۆیەک بەناوی فیدراسیۆنی نووسەرانی کوردستان – دیاسپۆرا دامەزراوە بۆ لە ئامێزگرتنی نووسەران بەڕەنگ و ئایدیا جیاوازەکانەوە بۆ ئەوەی داکۆکیکاری پاراستنی زمان و کولتوور و فەرهەنگی کوردی بن لە تاراوگە. ئەو فیدراسیۆنە تا ئێستاش دوو ناوەندی کردووەتەوە، ئەوانیش ناوەندی ئەورووپا و ناوەندی ئەمەریکا / کەنەدا وهەروەها چەندین ناوەندی دیکەشی هەن کە ئێستا کار بۆ کردنەوەیان دەکرێت .
هەوڵەکان خێراتر دەکرێن بۆ کۆکردنەوەی نووسەرانی تاراوگە
شاندێکی فیدراسیۆنی نووسەرانی کوردستان – دیاسپۆرا لە گەشتێکدا بۆ وڵاتانی ئەورووپا و دیدارو گفتوگۆکردن لەگەڵ نووسەران و ڕۆشنبیران ، هەوڵەکانیان خێراتر دەکەن بۆ ئەوەی زیاتر لە نووسەران و ڕۆشنبیران لە دەوری ئەو چرایە کۆبکەنەوە کە دەبێتە پارێزەری زمانی کوردی لە تاراوگە، لەو چوارچێوەیەدا سەردانی وڵاتی ئەڵمانیایان کرد و چاویان بە جەمال خەزنەدار و هاوڕێکانی و هەروەها لە هۆڵەندا چاویان بە دکتۆر جەبار قادر کەوت و پاشان بەرەو وڵاتانی ئەسکەندەناڤیا هەنگاویان بڕی و لەوێش چاویان کەوت بەکۆمەڵێک لە نووسەران کە تیایدا باسی ئەم پرۆژە نەتەوەییەیان بۆ کردن کە هەریەکەیان لە بواری خۆی وقەڵەم و نووسینیان ئەسپی خۆیان تاوبدەن و پێکەوە پێگەیەکی زانستی بۆ زمانی کوردی دروست بکەن ، هەروەها لە شاری بروکسل سەردانی نوێنەرایەتیی حکوومەتی ھەرێمی کوردستان لە یەکێتیی ئەورووپایان کردو لەلایەن د. دلاوەر ئاژگەیی نوێنەری حکوومەتی ھەرێمی کوردستان لە یەکێتی ئەورووپا پێشوازییان لێکرا و لە دیدارێکدا تیشک خرایە سەر ڕۆڵی فیدراسیۆنی نووسەران و ئامانجەکەی و باس لە ڕۆڵی نووسەران و کاری ڕۆشنبیری و ئەدەبی لە تاراوگە بەگشتی و ئەورووپا بەتایبەتی کرا، شاندەکە بە تێر و تەسەلی باسیان لە چۆنێتی دامەزراندن و کارەکانی فیدراسیۆن کرد، ھەروەھا ھەردوولا کۆکبوون لە سەر ھەماھەنگیکردنی نێوانیان لە بوارە جیاجیاکانی ڕۆشنبیری کە کاری پێکەوەیی سەرکەوتنی زیاتر بە دەست دێنێت.
کۆنگرەی فیدراسۆن
سەردار جاف سەرۆکی فیدراسیۆنی نووسەرانی کوردستان – دیاسپۆرا بۆ خەبات ڕایگەیاند : ئێمە کۆمەڵێک نووسەرین لە تاراوگە کەخۆبەخشانە خۆمان لە ژێر چەتری فیدراسیۆن کۆبووینەتەوە و ئامانجمان کۆ کردنەوەی نووسەرانە لە ژێر ئەم ساباتەدا ، ھەروەھا گوتیشی، ئێستا ماڵپەڕێکمان ھەیە بە ناوی دیاسپۆرا و لە لایەن نووسەرانەوە لە سەرتاسەری دنیا پێشوازییەکی باشی لێدەکرێت، سەرۆکی فیدراسیۆنەکە دەشڵێت : ئەم فیدراسیۆنە دوور لە ئایدیای سیاسییە ، ھەر چوار پارچەی کوردستان و کوردانی ڕووسیا و قەوقازیش لە خۆدەگرێت وچەندین ناوەندمان لە کیشوەرەکان ھەیە، لە سەرەتای ئەم مانگەوە گەشتێکی بەر فراوانمان بۆ وڵاتانی ئەڵمانیا و ھۆڵەندا کردووە، بە مەبەستی کۆکردنەوەی نووسەران و نیازمەندین لە ئاییندەیەکی نزیکدا کۆنگرەی خۆمان ساز بدەن، جێگەی باسە ، شاندەکە پێکھاتبوون لە سەردار جاف سەرۆکی فیدراسیۆن و سدیق شرناخی جێگر و غازی حەسەن بەرپرسی ناوەندی ئەمەریکا- کەنەدا و ئیبراھیم ئەلیوسف بەرپرسی ناوەندی ئەورووپا.
