هاوڕێی دڵ

‍ ((هاوڕێی دڵ))

فەرید ڕاژین/ شاعیر /  سنە

دڵ مەستە لەگەڵ شێعر و شەو و، شووشەو شەمدا
خەرمانی خەیاڵ و حەزی دڵ، ماچی بە خەمدا

زامارە دڵ و، بەندە لە دەس لەشکەری دیدەت
جادووگەرە، سەججادە لەگەڵ جامە کە جەمدا

تا دەستێ بکێشیتە سەری شێعری هەتیوم
چەن تۆم بە شەم و شێعری شەکەت گیانە قەسەمدا

هەرچەندە چەما دڵ لە چرۆی چاوەیی چاوم
ئاوی چەمی من شانی بە دەریا و بە چەمدا

بەو دیدەیە شینە، لە سەری دوو خەمی ئەبرۆ
حورمەت حەپەساوە، کە دی  تانەی لە حەرەمدا

سەرخۆشە غەزەڵ، کەوتە سەما دەفتەر و سەروا
پەیکی دەمی ئەودەم کە بەدڵ، کاتێ بەدەمدا

سەرسامە لە ئەوساوە سەرم بینی دووسێوت
تۆ چوویت و دڵم نوقمە لە نێو ماتەم و تەمدا

دوو هاوڕێیی دڵ ئێستە فەقەت هەر خەمە و ئەسرین
دەستم گەە لە گەردەن ئەوە، گەە گەردەنی ئەمدا.

مەفعوولۆ مەفاعیلۆ مەفاعیلۆ فەعوولۆن