دەردە کورد . . !
سەید هاشم هیدایەتی/نووسەر و شاعیر : سنە
دەردی بێ دەرمانی کوردان، دژ بە یەکتر بوونەوەس
دەستی خۆ تا نەیتە کایە، نایشکێنێ دەستی کەس
هەر زەمانێ بەرز ئەبێتەو، دەستێ بۆ تیماری زام
چەندەها دەس، بەر دەبن لێ، دێن بە گژیا، هەر بە قەس
سەیری مێژوو کەن لە مادەو تا هەرێمی ئەو سەدەی
خەنجەری کوردان لە پشتەو بۆ برا کوشتن چەنەس
تۆ بڵێی کەی تێ بفکرین بۆ برایی و هاو دڵی
تا بە کەی ئامرازی دەستی، نابرایەل، لار و پەس
سەد کەڕەت مار پێوە داوین بەس لە یەک سیلاخەوە
وەرزی زستان نابڕێتەو، واینە ژێر باری هەرەس
دوو کەسی ئێمەی لە گەڵ یەک پێکەوەی نامانکرێ،
وەک بڵێی عەهدی ئەلەستە، تا وزەی ئاخر نەفەس،
ئەو دەڵێ هەر کەس وەکوو من، بیر نەکاتەو، کورد نیە
من دەڵێم کوردی بەڕاسی هەر بەتەنیا منم و بەس،
نایەڵن چەترێکی کوردی، گشتمان بگرێتە بەر
هەرکەسێ خۆی لاوە کوردەو، مابەقی زۆڵەو بڤەس
هاوەڵان، بگرین، بناڵن، ڕۆژ و شەو وەک دەردەدار
کینە هەروەک مۆریانە ناقی کوردی بردە بەس!
کوردە هاوار ! دەسمە دامان با بەسی کەین دوژمنی،
لەو بوارەی، پێکەوەی بوون، هێڵی سوورەو ناوەرەس . . .
