“كوڕی مەریەمێكی ترم” و
گەڕان بەدوای پرسیارەكان
ئەرشەد تەحسين/ نووسەر/ سلێمانی
” كوڕی مەریەمێكی ترم”، یەكێكە لەچیرۆكەكانی كۆمەڵەچیرۆكی (كوڕی مەریەمێكی ترم )، لەنووسینی ” هێمن بەرزنجی ” یە و خۆی لە ” 17 ” چیرۆكدا دەبینێتەوە، لەدووتوێی 288 لاپەڕەدا لەساڵی 2018 چاپ كراوە، ئەم چیرۆكە لەڕووی زمان و تەكنیك و داڕشتنی نووسینەوە چیرۆكێكی ناوازەیە، لەگەڵ خوێندنەوەیدا لای خۆی گلت دەداتەوە و وات لێدەكات لەگەڵی بڕۆیت تا دەگەیت بەخاڵی كۆتایی. پرسیارە بێ وەڵامەكان ئەم چیرۆكە باسی كوڕێك دەكات بەناوی ” ئارام “، فڕێ دراوە و ژن و پیاوێكی پیر بەخێویان كردووە، زۆركات خۆی وەك منداڵی ئەو ماڵە دەبینێت و زۆركاتیش وەك كارەكەر، نەهامەتییەكانی رۆژگار و بەدبەختییەكان باس دەكات، هەر مرۆڤێك تامی ژەهری ئەو نەهامەتییانەی چەشت بێت دەیان پرسیاری سەیرسەیری لەمێشكدا درووست دەبێت.
ئەم چیرۆكە وێنەی مرۆڤێك پیشان دەدات كە بەدوای پرسیارە بێ وەڵامەكاندا دەگەڕێت، دەیەوێت لەم ڕێیەوە شتێك بەدەست بهێنێت كە ونی كردووە، ئارام بەدوای میهرەبانی و خۆشەویستیدا دەگەڕێت، لەناخەوە ماندوو بووە و سایەیەكی دەوێت بۆ پشوودان، وەڵامێكی دەوێت ئارامیی بەدڵی ببەخشێت. گەڕان بەدوای نادیارەكاندا كارەكتەری چیرۆكەكە لەشەوێكی تاریك و سارد و سامناكدا رێگایەكی ون دەگرێتە بەر، بۆ دۆزینەوەی شووناسی نادیاری، هەروەك چۆن مرۆڤەكانی سەرگۆی ئەم زەمینە رێگایەك دەگرنە بەر بۆ چنگ كەوتنی خۆشبەختی، دەیەوێت دایكی بدۆزێتەوە و لەو رێگایەوە بگات بەشووناسی، بەڵام ئایا ئەم رێگایە بەرەو كوێیان دەبات و چی تێدا حەشاردراوە، ئارام لەم رێگایەدا كچێك دەبینێت كە هەمان كێشەی هەیە و بەدوای دایكیدا گەڕێت. لێرەدا ئەوەمان پێدەڵێت كە مرۆڤەكان هەموویان بەدوای سێبەرێكدا وێڵن، دەردی هەمووان گەڕانە بەدوای نادیارەكانی ژیانیاندا و گەڕان بەدوای شوناسیاندا، لەكۆتاییشدا دەگات بەمرۆڤێكی باڵابەرزی پرچ درێژی بەرگ سپی، لەشێوەی تارماییەكدا هەواڵی بەدبەختییەكانی پێڕادەگەیەنێت، ئەو پێی دەڵێت جگە لەمەستی هیچ رێگایەكیتر نییە بیگەینێت بەخۆشبەختی، چونكە تۆ هەر لەئەزەلەوە بۆ خۆشیبەختی درووست نەكراویت.
تاریك وەك ژیان، ژیان وەك تاریكی ئەم چیرۆكە پتر لەژیان دەچێت، كێشە و مەینەتییەكانی ژیان دەخاتە روو، بەخوێنەر دەڵێت ئەمە ژیانە و پڕە لەكوێرەوەری و مەینەتی، ئەم ژیانە لەماڵێكی تاریك و وێران دەچێت كە مرۆڤ بەناچاری و بەڕێكەوت رێی تێكەوت بێت.
پاش ماوەیەك بۆی دەردەكەوێت هیچ شتێكی نابێت بەهی خۆی و ناچار دەبێت بەجێی بهێڵێت، رێك وەك ماڵی دایە مینا. كارەكتەری چیرۆك باسێكی ناوازەی تاریكی دەكات، شووناسێكی جیاواز بەتاریكیی دەبەخشێت، بەڵام لەتاریكی دەترسێت و دەیەوێت خۆی لێ رزگاربكات، لەڕێی ئەمەوە پێمان دەڵێت ئەم ژیانە سەخت و ناهەمووارە و دەیەوێت بەردەبازێك بۆخۆی درووست بكات لێیەوە لەدەست مەینەتییەكان هەڵبێت، هەربۆیە پەنا دەباتە بەر گۆزەیەك شەراب، تا وەك فریادڕەسێك بەرەو رووناكی ببات، ئەو بەتاریكی سەخڵەت و تووڕە دەبێت، ناحەقی نییە، مرۆڤ لەتاریكییدا هەڵناكات و راست و چەپی خۆی بۆ جیاناكرێتەوە، لەبەرئەوە لەدەست گەیشتن بەگۆزە شەرابەكەی دڵخۆش دەبێت، بێ ئاگا لەوەی هەركات خەمێك كۆتایی بێت خەمێكی تر سەرهەڵدەدات. گێڕانەوەی شێوە بازنەیی بەخوێندنەوەی چیرۆكەكە بۆمان دەردەكەوێـت، نووسەر گێرانەوەی شێوە بازنەیی بەكارهێناوە، كە شێوازێكی ناوازەی چیرۆكنووسینە، بەردەوام دیمەنەكان، چیرۆكەكانی ناو چیرۆكەكە، رووداوەكان دەگۆڕێت، دەیەوێت لەڕێی شێوازی گێرانەوەی بازنەییەوە دیمەنەكانی ژیان لەچیرۆكێكدا بخاتە روو، هەروەك كامێرایەكی ڤیدیۆیی ئەم دیمەن بۆ ئەو دیمەن پیشانی خوێنەر دەدات و تا لەكۆتایی دیمەندا خوێنەریش لەگەڵ كارەكتەری سەرەكیدا مەست دەبێت.
