مردوەکانتان زوو مەنێژن
ھبە فەسەڵ/ نووسەر
دەزانم ئەم بابەتەی من ئاماژەی پێ دەکەم، قبوڵ کردنی لەلایەن هەندێ کەسەوە قورسە. بەڵام هیوادارم کە بەدڵ و تێگەیشتنێکی فراوان بیخوێندنەوە.
بەردەم خستنی بابەتەکەیش تەنها بۆ روون کردنەوەی چەند خاڵێکە کە گرنگی زۆری هەیە بۆ پرۆسەی ماڵئاوایی کردنی جەسەدی و ڕۆحی لە مردووەکانمان. لە هەمان کاتدا چۆن خزم و خۆشەویستانی مردوو بتوانن ژیانیان بەردەوابێت بێ ئەوەی مردنی ئازیزیان ببێتە برینێک هەردەم بکولێتەوە.
بەپێی ئەزموونی ژیان و بەسەرهاتەکانی، هەندێک پرسیارت لا درووست دەبێ جا گەر مناڵ بیت یان گەورە.
من کاتێك مناڵ بووم و سەردانی خزم و دراوسێمان دەکرد، سەرم دەسوڕما لە ئەندامانی خێزانێک، کە دوای چەندەها ساڵ لە کۆچی دوایی باوکیان، برا، هاوژین و هتد هەر دەگرین و دڵیان گەرم بوو وەک وابێ ئێستا لێ یان ڕۆیشتوە. هەتا خۆشم گەیشتمە تەمەنێک و هەمان شتم دووبارە کردەوە.
مردنی نازدارترین، بێ وێنە و ئازیزترین کەس لە منداڵیم دا، بوو بە قورسترین بار کە بەهیچ شێوەیەک نەم دەتوانی بۆ کەسی بگێڕمەوە و باسی بکەم. دەمم ڵاڵ و بێ ووشە. قوڕگم قورس وەک وابێ چنگی تێنراوە. خنکاو و بێ هەناسە.
ئاسانترین بەسەرهات کاری تێ دەکردم و دەیگریاندم.
دەمزانی کە ئەمە ئاسایی نیە. شتێک هەیە کە لە ناخەوە بێ ئەوەی خۆم بزانم ئازارم دەدات و لەگەڵ هەموو تازەیەکدا، لێم سەر هەڵئەداتەوە.
لەگەڵ خوێندن و بەدواداچوونما رۆژ بە رۆژ سوچی تازەم دەدۆزیەوە و خاڵم لەسەر پیتەکان دادەنا.
بۆم دەرکەوت کە یەکێک لەو هۆکارانەی مرۆڤ دەچەوسێنێتەوە و سزای ئەدا، کات و هەق نەدانێتی بەو پرۆسێسانەی کە لە ژیانیدا پێیدا تێ دەپەڕێ. بۆ نمونە کاتێک ئازیزێکی دەمرێ. تا چەند دەوروو بەری دەهێڵن پڕ بە دڵ و بە شێوەی خۆی ماڵئاوایی لە خۆشەویستەکەی بکات. چەنێک دەهێڵن بیبینێ و دوا قسەی لەگەڵ بکات.
ئەو کەسانە خۆشەویست بن، باوک و کوڕ یان کچ و دایک ئەمانە چاپتەرێکیان هەیە لە پێکەوەژیان. خۆشی و ناخۆشی، شەڕ و ئاشتی، ئەو چاپتەرە دەبێ بە جوانتری شێوە دابخرێت. ئەمەش مانای ئەوە نیە کە لە بیر بکرێت. لە بیر کردن نیە، بەڵام لەگەڵی ژیان هەیە بە ئاشتی( التعايش مع الماضي).
زۆربەی حەسرەتی ئەو کەسانەی کە گفت و گۆم لەگەڵ کردوون ئەوەیە کە نەگەیشتوون مردویان ببینن پێش ناشتنیان. نەگەیشتون بە هێمنی ماڵئاواییان لێ بکەن.
مردن لە خودی خۆیدا زۆر ئاڵۆزە. بە هەمان شێوە تێگەیشتن و قبوڵ کردنی.
هەر بۆیە لەپڕ دابڕان بێ ماڵئاوایی، پرۆسەکە قورس تر و بێ مانا تر دەکات.
هەمیشه ئامۆژگاری و ئیشم لەگەڵ ئەو کەسانەدا بە چەند خاڵێک دەست پێ دەکات.
١- کۆڵ مەدە و هیچ کاتێک مەڵێ تازە تەواو، ڕۆی
٢- هەتا ئەتوانی باسی پرۆسە و هەست و قورسی لە دەست دانی مردووت بکە. بیگێڕەوە و مەیکە بە تابوو.
٣- گەر ناتوانی باسی بکەی، بنوسە. هەرچیەک فریا نەکەوتووی بیکەیت یان بیڵێیت، بینوسە وەک نامەیەک بۆ مردوەکەت. مەرج نیە تەنها خۆشەویستی بێت. سەرزەنشت و گلەیی و توڕەیشتی بۆ بنوسە. بیخوێنەرەوە بەدەنگی بەرز.
٤-ڕێگە و کات بەخۆت بدە بگریت، دڵتەنگ بیت. کاتێک خەم لەدەرگات دەدا، بهێڵە بێتە ژورێ. دەرگای لێبکەوە و پێ بڵێ کە هاتنی کاتی یە.
دڵنیام گەر دەست بە پەیڕەو کردنی یەک خاڵیش لەمانە بکەی، دوای ماوەیەک هەست بە سوکی ئەو بارە دەکەی کە چەند ساڵە لەسەر شان و دڵت وەک کێوێکی قورس و سەختە.
سوپاس بۆ تۆی خوێنەریش
#مردن
#جەرگوجگەر
#ژیان
#مرۆڤ
#بەردەوامی
#💜
