DEMA KU ….
Ferhad Drê’î/ helbestvan/ Elemanya
Dema Ku navê te dixwînim
Yan wêneyên te dibinim
Dilê min dibe tembûr
Gurcikên min dibin dengbêj
Û kezeba min dibe meyger
De îja ka kî dizane
Damarên min
Bi çi rengî têne givaştin ..
Têne dawerivandin .
Û de ka kî dizane
Di meyxana hinavan de
Çi zarokên êş û xeman ez ditepînim
Û dilorînim
***
Dema ku navê te dixwînim
Yan wêneyên te dibînim
Çîvçîva çûka , dengê şalûla
Û fîxanên bilbilan
Di zengelolka min de
Li hev diterpilin
Bê ka kî berî kê
Ji tîbûna evîna min
Bifire û xwe bigihîne
Buhişta sîng û berên te
Bê ka kî berî kê
Rahêje nîşanên rûmeta cangoriyê
Di evîna te de
De îja ka kî wekî min
Wisa xwîn li laşê wî di tewire
Û de ka kî wekî min
Digirava eşqa tede wisa newq dibe
***
Dema ku navê te dixwînim
Yan wêneyên te dibînim
Germtirîn helbest
Di paxila temenê min sor dibe
E .. e
Dibe bizot û pêt ..Lêêê
Govend û dîlana agire
Bi çepk û lîlandin
Defa barandina hêsira
Li dar dixin ..Lêêê
De îja ka kî wekî min
Di evîna tede wisa bê zar û ziman dibe
Û de ka kî wekî min
Di tenûra hezkirina te de
Nanê ay û axîna di pêje
14.05.2024
