سۆز و خۆشەویستی لە تابلۆی ( توانەوە )ی هونەرمەندی شێوەکار ( یوسف خەسرەو )دا
د. ئازد ئەمین باخەوان/ کەرکووک
ئەم تابلۆیە دەربڕینی حاڵەتێکی قووڵی تێکەڵبوون و توانەوەی نێوان هونەر و هونەرمەندە کە ( مۆسیقاژەن و کەمانجەکەی ) دەبنە کارەکتەری سەرەکی بۆ کردنەوەی دەرگا بەڕووی کۆمەڵێک ڕەهەندی هەمەجۆر ، وەک ڕەهەندەکانی ( دەروونی و فەلسەفی و کۆمەڵایەتی و بوونگەرایی … هتد ) .
لە ڕووی دەروونییەوە ئەم تابلۆیە گوزارشتە لە توانەوە و تێکەڵبوون و خۆشەویستی و سۆزداری و لایەنی دەروونی نێوان مۆسیقاژەن و کەمانجەکەی . بەو پێیەی ئامێری کەمانجە دەبێتە ئامرازێک بۆ دەربڕینی هەستە سەرکوتکراو و خەفەکراوەکانی خۆی و پەیوەندیکردنی لەگەڵ کەسانی دیکەدا .
ئەوەی زیاتر جێی تێڕامان و سەرنجڕاکێشانە لەم تابلۆیەدا ، ئەو کەمانجەیەیە کە لە نێو پەنجەکانی کەمانجەژەندا وەک دایکێکی پڕ سۆز و خۆشەویستی بووە بە منداڵێک و لەگەڵیدا بە شێوازێک تواوەتەوە هەست دەکەی باوەشی بە منداڵێکدا کردووە نەک کەمانجەکەی …!
هەر بەڕاستیش جێ پەنجەی هونەرمەندی شێوەکار ( یوسف خەسرەو ) دیارە کە بەشی پێشەوەی کەمانجەکەی بە شيوەیەک وێنە کێشاوە کە بە تەواوی هەست دەکەیت سەری منداڵێکە و بە سنگی دایکییەوە نوساوە و لەگەڵیدا تواوەتەوە … ! ئەم پەیوەندییە دەروونییە دەشێ بە هێمایەک دابنرێت بۆ پەیوەندی نێوان دایک و منداڵەکەی ، یان ڕەنگە هەست و دەربڕینێک بێت بۆ پەیوەندی نێوان هونەرمەند و هونەرەکەی ، کە هونەر دەبێتە بەشێک لە خۆدی هونەرمەند ، هەروەک چۆن منداڵ دەبێتە بەشێکی دانەبڕاوە لە دایکی …!!
سەبارەت بە داخستنی چاوەکانی کەمانجەژەن دەربڕینی لوتکەی توانەوەیە لە نێو جیهانی سۆز و خۆشەویستی و جۆش و خرۆشی دایکایەتیدا … ئەو جیهانە تایبەتییەی دایک بۆ جگەرگۆشەکانی سازی دەکات ، هەمان توانەوەیە ، کە کەمانجەژەن لەگەڵ کەمانجەکەیدا تێکەڵ دەبێت و جیهانێکی پڕ لە سۆز و خۆشەویستی دروست دەکات … !!
باکگراوندی تابلۆکەش جێی سەرنج و تێڕامانە ، ئەو هەموو چاوانە و ئەو هەموو شێوانەی کە دەبینرێت مانای تێکەڵبوون و توانەوەیە لەگەڵ هەموو سروشتدا ، بە هەموو جۆرەکانییەوە بە دار و بەرد و مرۆڤ و گیاندارانی دیکەشەوە کە دەشێ وەک پاڵپشتییەکی دەروونی و سۆزداری ئاماژەی پێبکرێت ، بە تایبەتی دەرکەوتنی گیاندرێکی وەک سەگ لە بکگراوندی تابلۆکەدا ، کە هێمای دۆستایەتی و دڵسۆزی و وەفایە … !
یان دەتوانیین بڵێین ئەم بانکگراوندە ئەو بیرۆکەیە بەهێزتر دەکات کە ( خود ) گۆشەگیر و قەتیسماو نییە لە چوارچێوەیەکی تەسکدا ، بەڵکو بەشێکی گرنگە لە تۆڕێکی فراوانتر لە پەیوەندییە جۆربەجۆرەکان و کارلێکەکان … !
ئەم تابلۆیە بانگهێشتمان دەکات بۆ بیرکردنەو
ە لەو پەیوەندییە دەروونی و سۆزداری و کۆمەڵایەتیانەی کە دەمانبەستنەوە بە کەسانی دیکە و بەو شتانەی خۆشمان دەوێن، ئەمەش هۆکارێکی زۆر گرنگە بۆ زیاتر تێگەیشتنمان لە ( ناسنامە ) و پەیوەندی نێوان ( خود و جیهان ) … !
تێبینی :
– ئەم تابلۆیە بۆ یەکەمجار لە واڵی هونەرمەند ( یوسف خەسرەو ) بڵاوکرایەوە من ناوی ( توانەوە )م لێنا … دواجار بوو بەم لێکدانەوەیە … !
