دەریا ھەورامی
شاعیر، سلێمانی
………………
تـاوی سینەم دێنێتە جۆش
ئاهـی کچێـک
شـوشـەی ڕازەکانــی
دەزڕێنــێت
پەتـی ئەوینی بە دیواری ترسەوە دەڕزێــنێت
خـورپەکانی بە بێـداری
تـا جـاویـدان ترپـەیـان دێت ..
سـرتـە و
ورتــە و
چپــەیان دێت ..
خۆم و یارییەکانم بە خەمی
گەورەکانەوە دەتلاینەوە
هاوئازاری نەریتی داتەپیو و
جەنگی نەگریس بووین ..
دارهەلووکەکەم
جارێک دەبووە گۆچانی ڕێبوارێک
جارێک دەبووە قاچی نەنکم بۆ کۆڵانێ ..
تا پێم بڵێت:
کچێ شوورەییە
وەختی شووتە
وەرە ژوورێ
جارێکیش دەبووە باڵای لاولاوە خواروخێچەکەی بەرهەیوانێ ..
بەردی خەتخەتێنەکەم
بزر دەبوو
دایکم خورپەی ناوکە کەوتووەکانی
مەرگەساتەکانی کورد و
سەرەڕۆیی براکانمی
پێ دەگرتەوە ..!
پەتی پەتپەتێنەکەم
دیار نەدەما
خوشکەکەم
بەڵێ خوشکەکەم ..
لە کۆڵانە شاراوەکە
دەیکردە تەناف
تا پەڕۆی سووڕی مانگانەی
پێ هەڵبخات ..!
نەکا دایکی نەریت پێی بزانێ و پێی بڵێت:
ئەی بێ حەیا بۆ وات لێهاتووە؟
پەتپەتێنی ئەو ناوەی پێ بکات ..ا
بەردی هەڵماقۆکانیـشم
دەبوونە سـیان
براکەم جارێ شووشەی پێ دەشکاندن
جارێ خوێنی چۆلەکەی پێ دەڕژاندن
من سزا دەدرام و
ئەویش زیت زیت لێی دەڕوانیم،
ئێستاش گەورەبووم
پک پک دەکڕووزێمەوە
لە بەرگی بێدەنگیمدا
هێشتا یـاری
بە چارەنووسم دەکرێت
لە ئامێزی نیشتیماندا!
