قادر شـــیری
شاعیر، ئەڵمانیا
…………….
ناومان لە کێلی سەرت هەڵبکەنە
هەر چی برینمە هەڵبدەوە
پێکەنینی تۆی تیا هەڵدەقوڵێ
ماسییەک تێدا باوێشک دەدات
زریکەیەک مان دەگرێ
ژنێک خەمەکانی دەشێلێ
ناوم بووسە لە لات
بێدەنگیم کرمەی دێت
وەڕەزیم تاو بردی!!
نەکا سێبەرت درز ببات
پەڵە تیشکێ خەیانەت بەو سەفسەتەیەی
پێی گەمژاوین
بکات/ نەکات
نامەیەک
لە دیوی تاریکی ڕۆحتەوە قەرزدارم خاتوون
کاسبوونێک بە دیارمانەوە
گێژ دەخوات
دڵۆپەی وەهمێک چزەی دێت
ڕەنگە لە گەروویی باڵندەیەکا
ڕاکشابێ و
بۆن بە هێلانەیەکی تەڕەوە بکات
یان جریوەیەکی کەڕەوە بکات!
کاڵبوونەوەت لە کاڵی سێوێک ئەچێ
هەرچی سێبەرەی بە قونتەرات گرتبێ
وا مەزانە بە حەسرەتی
ئەو دەمەی لێوم لە ئەستێرە دەگرم
هەرچی خۆرە هەڵدەوەرن
هەر چی مانگە بە دزییەوە هەڵئەپەڕن
لێو هەزاران ماچی شاراوەی تێدایە خانم
پایز گەر حەسرەتی گەزیزەی لا نەبێ دەوەستێ
پاڕادۆکسێکم
چزیوم بە لیتەی کەنینی نماویـتا
لە پەرداخێکی بەتاڵا قەترانیمە
وەک ئازادی منی یاخی
لە باوێشکێکی تەڕێ تۆدا جێم نابێتەوە
کە یەکەم هەنگاوم نیشتمان ڕفاندی
ناومان لێ نا ئازادی
نە لە جامانەی مێژووا
نە لە خەنجەری بەر پشتێن
نە گەرووی باوە گەورەمان
شەهیدانیش،
هۆ ئازادی
تۆ وای لە درزی هەنگاوی تێکۆشەرێکی سەدەیا مان گرتووتی
لە برینی لاقەکانیا هەڵمساوی
چەندد خۆت لە گەروومان ساوی
چەندد برینمان پێشکەش کردی
نە زیندوو مایی و نە مردی
ڕەنگە لە سەنگەرێکدا
بۆنت کردبێ
یان لە چاوی دەرپەڕیوی دایکێکدا
دوووووور بڕوانی
یان لە جانتای خۆفرۆشێک
بە دزیەوە
سروودی ئەی ڕەقیب بڵێی
یان بە قوون فیشەکێکەوە
بریقەت دێ و چاو دادگری.
٭٭٭٭٭٭٭٭
بمممم شێلە خاتوون
بمشێلە ڕووبار
نەکا بە دەم پێکەنینەوە گەشکە بگرم
بتوێمەوە
نەکا بە گریانەوە گڕ بگرم
بمشێلە تا دوا وێستگەی حەسرەت
تا تەمایەر هەرەس دێنێ
هاکا لە بیرەوەیــشدا بزر بووین
بزر بوونی بەتاڵە لە مانەوە
مانەوەی قومێک چاوەڕوانی
قومێک دوو دڵی
قومێک نەگەیشتن
هەر وەکوو
چینەی بزەیەک گەرای قاقایەکی هەڵمژیبێ
یان شەپوڵێک
دڵەکوتەی چەندد ماسییەکی دزیبێ
یان حەسرەتێک
لە قوڵایی ماچێکەوە ڕۆخزیبێ
منداڵیم بە ئامێزتەوە هەڵدەزنێ
گەورە بوونت لێ قەرز دەکات
چاوەڕونیت پیا ئەساوێ
وێنە لە بۆنت دەکێشێ
دواچۆڕی نیگات تام ئەکات
مژ ئەدات لە حەسرەتە نەکوڵیوەکانی تەمەن
کەروێشکەی بەژنت ئەقریشکێنێ
وەکوو چۆن جووت بوونێک لە منا ئەگەیێ
برووسکە لە تۆدا سەرچۆپی کێش
من منداڵیم بە قەرز داوە
تازە ڕووم لێناکاتەوە
وەک ماچێکی سەرمابردوو
ئەبرژێ بە گۆناتەوە.
٭٭٭٭٭٭٭٭٭٭٭٭
سااااا کە مێهرەبانیت هەڵمی لێ هەڵدەستی
چاوەکانت قەتماغەی پەنگی مێژوومن
هێشووی دڵەتەپەی ئەو ساڵانەی بۆت دەگەڕام
نەم دەناسیت
تۆ خەونی بریقەداری دەم بارانی وردە ماسیت
تا ڕوانینت لە گۆ دەکات
وردە شەپۆل دەچنییەوە
باڵە سرتە دەخۆیەوە
لە بەر ئەکەی
هەر بە ڕووتی
بە ناو شەپۆلێکی ڕووتا
سەفەر ئەکەی
” ئەو دەمەی هەناسەت نا
بست بە بست با دەبڕم
ئەشق تەنیا شایەتێکە
ئەو دەمەی نیشتمانێکت لە خۆزگە بۆ دەچنم
ئەشق تەنیا شایەتێکە
ئەو دەمەی پایز دەلورێنم
لە گەڵایەکدا سیس دەبم
لە ماسییەکدا… کاس
سەوز نا، زەرد نا،
باڵ دەگـــــرم
ئەشق تەنیا شایەتێکە
ئایەتێکە لە پەلکەزێڕینە نا
لە پەلکی مەرگ
پەلکی چاوەڕوانی
پەلکی چڕبوونەوەی …
پەلکی هۆنینەوەی خاک
زێدەتر لە ئاو؛ کانی
قەترانی لە شەمڵانی ئامێـــز
پەنگاوتر لە پرشەی تاریکی
گلارەی تلیساوی خۆزگە
فڕڕەی هەڵاتووی گلێــنە
گەنگەشەی شەقامێک
ڕێبوارێکی ون بووی تیا گلابێ
زریکەی پەسێوێکی مردن
قەڵەمی مێژوونووسێک ئەنگاوتبێی
ڕوانینێکی هەڵگەڕاوەی خاتوون
لە شۆڕاوی تەمەن بەربوویەوە
کوڵاوە حەسرەتم
کە لوورەی بلوورینی شەرم
ژەنگ ئەبات
گورگێکە تەماحی منداڵیم بە کاڵی دەکرۆژێ
جێ پەنجەت بە ڕووباری بیرمەوە جێماوە
ماندووبوونت لەبەرکەم دەحەسێم
بمشێــلە خاتوونم بمشێــلە
گەزیزە حەسرەتی پایزە و
تەمەن نایداتەوە.
17ی جۆزەردانی 2721ی کوردی
