عەبدوڵڵا سەڕاج
نووسەر، سويد
…………….
کۆتایی چلەکانی سەدەی ڕابردوو لەگەڵ کوڕێکی کۆڵانەکەمان چووین بۆ سەردانی باوکی لە شارەوانی کەرکوك کە ئەو دەمە بە تەك سەرای کۆنەوە بوو. لە ژوورێکدا ئەو شاعیرەم بینی کە لە بڵاوکراوەی کەرکوکدا کاری دەکرد کە بە عەرەبی و تورکمانی چاپ دەکرا لەوێ سمێڵێکی کاکەییانەی هەبوو بە هەر دوو زمانی تورکمانی و کوردی شیعری دەنووسی و، داخەکەم خانەوادەکەی دەستیان بەسەر بەرهەمە کوردییەکانیدا گرتووە ، ئەوسا چاپکراوەکان دێڕ بە دێڕ بە پیتی قوڕقۆشمی دەچنران.
(دەدە) دەق وەرگێڕانی ( باوە)یە کە لای برایانی کاکەیی پیرۆزە وەکوو: باوەیادگار، باوەگوڕگوڕ، بابە تاهیری هەمەدانی و، لە نزیکی کەرکوکیشدا دوو دێ هەن بە ناوی (باوەفەتی) و ( باوە). دەدە هجری پەیوەندی بە پیرەمێردی شاعیرەوە هەبوو کە ئەویش بۆ شارەوانی سلێمانی هەفتەنامەی (ژین)ی دەردەکرد لە یادیشمە ئەوسای شاعیری ڕەوانبێژ پیرەمێرد لە ١٩٥٢دا وەفاتی کرد، لە چلەی ماتەمینەکەیدا شیعرێکی درێژی بە کوردی خوێندەوە بەندەيش ئەو شیعرەم لە گۆڤارێکدا خوێندەوە.
لە پاش شۆڕشی تەموزی ١٩٥٨ لە بڵاوکراوەی کەرکوکدا بەشی کوردیش کرایەوە کە وەك بزانم عوسمان خۆشناو بەڕێوەی دەبرد جێگەی خۆشیەتی کە بۆ مێژوو تۆماری بکەم کە لە ڕاپەڕینی ١٩٤٨دا عوسمان خۆشناو لە سەر دیوارێکی لێواری قەڵا کە بەرامبەر تاکە پردە بەردینەکەی سەر خڕی خاسە بوو شیعرێکی شۆڕشگێڕانەی خوێندەوە کە ئاوها دەست پێدەکات:
ڕەوڕەوەی مێژوو ، بە جەبری جەبری ناگەڕێتەوە
ئێزادەیەتی و یاریسانی جووتێ ئایینی ڕەسەنی کوردینە کە نووسراوە پیرۆزەکانیان کوردییە وەکوو: سەرەنجام، جەلوە، مەسحەفە ڕەش و هیتر، منیش ئەم دوو دێڕەیان پێشکەش دەکەم کە لە ناویاندا هونەرمەند و ڕۆشنبیر وئەدیب زۆر هەڵکەوتوون.
لە نێوان خۆت و خودایە بڕوات
بەرهەمت بۆ گەل و نیشتمان بێت
ئاوها کاروانمان ، ئامۆزا و کاکە
قۆناغ دەبڕێ ، و هەر زوو دەگاتە جێ
تێبینی:
زانیاری زۆرم لە سەر ئەو شاعیرە کەرکوکيیە نییە، تکا دەکەم هەر بەڕێزێك زانیاری پتری هەیە با ئەم کورتە نووسینەمی پێ بڕازێنێتەوە خۆ ئەگەر کەسێك پەیوەندی بە نەوەکانییەوە بکات بۆ زانیاری زیاتر خۆشحاڵ دەبم.
