کامڕان شافیعی
شاعیر، نەرویج
…………….
ژنێک هەموو بەیانییەک
بۆنی پرچەکانی
بە سەر ئەم کۆڵانە دا دەپڕژێنێ
غەریبیم بە بۆنی هیوا، عەتراوی دەکات
بە گوڵی سووری سەر کراسەکەی
و بزەی سەر لێوی
برینی تەنیاییم سارێژ دەکات
ژنێک
هەمو ئێوارەیەک
دە گەڵ باران سەر بە شوشەی پەنجەرکەمەوە دەنێ و
سەرتاتکەم دەگەڵ دەکات
ئەم ژنە دەڵێ
«هاتووم بۆ ژووانی ماچ و ئاوێزانی بێکەسیت دەبم »
ئەو ژنە
پڕم دەکاتەوە لە ئەشقی ئاشنایی
ژنێک کە
هەمو شەوێک دەگەڵ مانگ
دێتە سەردانم ،
تریفەی ئەوین دەڕژێنێتە ژووری تاریکم
گۆرانی (خۆشمدەوێی)دەکات
بە لایەلایەی شەوانم
