هونەر موکريانی
شاعير، مەهاباد
……………………….
خۆشم دەوێی و سادە دەمرم بۆت
پێشمکوتووی بەر لەوەی سەت جار
شایەد لهجێگەدا هەر ئەوشۆکە
شایەد سبەی کە دەچمەوە سەر کار
خۆشم دەوێی و دوو قەدەم ڕێگەم
تا تۆ بگەی بە شاعیرێکی ڕووت
پێویست نییە قەسیدەیەک باران
دانیشە دەی عەزیزەکەم، دەتکووت….
ئەو دەم شتێ لە ئارەقە و چڵکم
ساتێ لە ژێر دووشم و زیندووم
خۆشم دەوێی و هیچ نازانم
پیاوێک ژینم و هەمیشەش بووم
یەک چرکە تاهەتایی بۆ هەستێک
من بم لە رووبەرووت راوەستاو
دووپاتەبوونەوە و دەگەڵ تۆ بوون
ژن بوون بە کاتی ناتەواوی پیاو
خۆشمدەوێی و دێ حەسوودیم بە
هەرکەس گرینگە بۆت جا کولـلەن
فەڕقی نییە چ عیددەیێ دمڕووت
یا تاقمێ کە ئەوجن و قولـلەن
من ناکەوێتە دەستی تۆ وەک من
ئەو خەڵکە کوێری ئەو سەر و وەعزەن
حاڵیبە جاروبار ناحاڵی
عاسابی من خرا دەکەی بەعزەن
خۆشم دەوێی و قەڵس و لالووتی
ئاخر دە چی بووە کچێ مەیموون
گهر بێ بزەت بە جۆکی شێتی من
پێویست نییە حەکایەتی مەجنوون
من کار و نەوس و بیییب و گەندوگووم
چەن جووت گۆرەوی، ڕیکابی، شۆرت
زوو زوو عەوەز دەبم کە هاتۆچۆم
قەندم کە زوو دەبم بە قۆزەڵقۆرت
خۆشم دەوێی و ئارەزوومەندم
پارێزەرت بە کۆش و باوەش بم
بۆ من بی بۆ من و بەتەنیا من
بۆ من بی تا هەبم ئەگەر نەشبم
ژیانێ ئەوینی چێرەیی و چووکم
ئەی تۆ وەنەوشی خاتراتی من
تا شێعر تۆم بوێ لەدەستم دێ
ئەی بەرزتر لە دەسهەڵاتی من
بۆ ویستنت دەژیم تا دەمرم
گەرچی تەمەن لەپات ناکامە
بۆ ویستنت دەنووسم و دەمرم
دەستم کراوەتر لە توانامە
شایەد کە پێت نەگەم کە نەتبینم
شایەد کە خۆت بی فەقەت بۆخۆت
شایەد نەبم بە ویستی تۆ ئەمما
خۆشم دەوێی و بۆت دەمرم، بۆت…..
٢٤ی خزەڵوەری ١٤٠٢
