دکتۆر شادان عەلی
نووسەر و نيگارکێش، سلێمانی
………………………
ئای لەم ژیانە دڵڕەقە؛ هیچ ئاگای لەخورپەی دڵەکان نیە.
وەکو گیزەی مێشێک و هەڵکردنی ڕەشەباییەکی بەهێزو داگیرسانی جگەرەیەک بەخەیاڵی خەمی دەوروبەرەکەیشیدا نایات.
ڕاکەڕاکی ڕۆژگارو هیلاکی و ماندوو بوون، هیچ لەبابەتەکە ناگۆڕدرێت ، ناهێڵێت پشویەک وەربگرین، لەپڕ بێگوێدانە دڵی بەتەمەنەکان و نەخۆش و منداڵ و گەورەو بچوکەکان، خۆی دەخزێنێتە ماڵەکان و حەزی لەکێ بێت لەگەڵ خۆی ڕاپێچی دەکات و دەیبات.
منداڵەکان بێ باوک بەجێدەهێڵێ و کچەکان بێ براو ژنەکانیش بێ هاوسەرو پیاوەکانیش بێ دایک و هاوژین، بەتەمەنەکانیش جەرگ سوتاو دەکات.
ئازیزەکانمان بەدرێژایی تەمەن ناهێڵن تاڵێک موو بێتە سەر چاوەکانمان .
ئەوەندە ئازیزن وەکو گیانی خۆیان دەمانپارێزن.
کەچی مردن لەهەر کون و قوژبن و کەلێنێکەوە بێت، دێتە ژوورەوە. هەموو شتێک ژێراو ژوور دەکات.
نازەکان دەپوکێنەوە، دڵەکان توند و ڕۆحەکان دەگوشرێن و پێکان بە خەیاڵ هەنگاو دەنێن و وێنەکانیش لەناو چاوەکان ناسڕێتەوە، دەنگێکیش بەدرێژایی تەمەن لەناو گوێکان دەمێنێتەوەو دوبارە نابێتەوە.
تاهەتایە بەحەزرەتی بینینەوەیان دەمێنینەوە. غیاب بوونیان تەواو بێتاقەت و بێهێزت دەکات.
ڕەنگەکان دڵ ناکەنەوە، خواردنەکان تام و بۆیان نامێنێت و دانیشتنەکانیش بۆ هەمیشە دەبێتە ماتەم … پێکەنینەکانیش دەبنە فرمێسکی هێمن و ئارام دێنە خوارەوە، دڵیش لە کێشانی ئازاردا هەرئەوەندە نیە بوەستێت.
لەکۆتایدا ژیانی هەموان دەبێتە چرایەکی بێ هیواو بێ سوتوو خامۆش دەسوتێت.
ـــــــــــــــــــــــــــــــــــــــــــــــ
