ئەرشەد تەحسین
نووسەر ، سلێمانی
…………………..
كتێبی ( لەئەزموونەوە بۆ هیوا ) نووسینی ( خۆشی شوان)ە، بەتیراژی (١٠٠٠) دانە لەساڵی ٢٠٢٥ بڵاوبووەتەوە، ئەم كتێبە سەرەنجامی ئەزموونی نووسەرە لەگەڵ نەخۆشی شێرپەنجە، لەڕێی ئەم كتێبەوە نووسەر بۆمان دەدوێت و دەیەوێت خوێنەر لەو گەشتەی خۆی ئاگادار بكاتەوە كە لەگەڵ شێرپەنجەدا بەسەری بردووە، باسكردنی ژیانی تاڵی خۆیەتی هاوشانی نەخۆشی شێرپەنجە و ئەو لێكەوتانەی لەو ماوەیەدا تێیپەڕاندووە.
ئەگەرچی نەخۆشی شێرپەنجە لەگەڵ بیستنی ناوەكەیدا دەیان بیری ناخۆش و تاڵ و پڕ ئازار بەمرۆڤ دەدات، بەڵام نووسەر جیاواز گەشتمان پێدەكات و بەئیرادەوە چاومان بەوشەكانی كتێبەكە ئاشنادەكات، باسی ئەو ڕۆژانە دەكات كە بۆ هەر مرۆڤێك لەشەوگاری تار تاریكترن كاتێك بەو نەخۆشییە دەردەدار دەبێت، بەڵام ئەو پێمان دەڵێت ئیرادە و پاڵپشتی كەسانی دەوروبەر زامنی سەركەوتنن بەسەر نەخۆشی و ناخۆشیدا، هەربۆیە ئەو كەسانە لەیاد ناكات كە هەمیشە وەك چیایەك لەپشتی بوون و نەیان هێشتووە باڕەشی نەخۆشی شێرپەنجە بیخات، ئەو وانانەمان پێ دەڵێت كە لەگەشتی خۆی لەگەڵ شێرپەنجەدا فێریان بووە.
پەیامی هیوای پێیە.
نووسەر لەم كتێبەدا پەیامی هیوا و ژیان و ئیرادە و بیركردنەوەی ئەرێنی دەگەیەنێت، چاوی هەموو ئەوانە دەكاتەوە كە ژیان لەگەڵ نەخۆشی شێرپەنجەدا دەگوزەرێنن و خەریكە لەژێر هەژموونی بێهیوایی و بیركردنەوەی نەرێنیدا هەرەس دەهێنن و دەڕووخێن، پێمان دەڵێت ئیرادە و هیوا بەسن بۆ بەرەنگاربوونەوەی نەخۆشی و سەركەوتن بەسەر ناخۆشییەكاندا، ئەو دەڵێت ڕاستە ئەوانەی تووشی ئەم نەخۆشییە هاتوون شەوگاریان تاریك و پڕ ئازاڕە، بەڵام دوای هەموو شەوگارێكی درێژ ڕۆژێكی رووناك بوونی هەیە، تەنیا ئارامگرتن و ئیرادە دەتگەیەنێت بەرۆژی رووناك.
ئەم كتێبە گەشتی سەركەوتنی ئیرادەی مرۆڤە لەجەنگی دژی شێرپەنجەدا، بەبڕوای من خوێندنەوەی دەبێتە چەكێكی بەهێز بۆ سەركەوتن بەسەر نەخۆشی و ناخۆشیدا.
كتێبەكە دابەشی چوار بەش كراوە.
ئەم كتێبە دابەشی چوار بەشی سەرەكی كراوە، هەر بەشەیان گرنگی و تایبەتمەندی خۆی هەیە، لەبەشی یەكەمدا نووسەر باسی ژیانی خۆی دەكات لەماوەی تووشبوونی بەشێرپەنجە، چیرۆكی خۆی لەڕۆژانی هاتووچۆی نەخۆشخانە و وەرگرتنی چارەسەر و ئەو دۆخەی پێیدا تێپەڕبووە دەگێڕێتەوە، وەك نووسەرێكی ئاسایی لەسەرەتاوە بەباسكردنێكی سادەی پێش تووشبوونی بەشێرپەنجە دەست پێدەكات، پاشان دەچێتە سەر ئەو ڕۆژە و ئەو چركەساتەی هەواڵی تووشبوونی نەخۆشیەكەی پێڕادەگەیەندرێت، چۆنییەتی بیستنی هەواڵەكە و مامەڵەی خۆی لەوكاتەدا دەخاتەڕوو، دواتر هێدی هێدی بەرەو رۆژانی چارەسەر و چۆنییەتی سەردانیكردنی نەخۆشخانە و تێكەڵبوونی لەگەڵ نەخۆشانی تر باس دەكات، تا دەگات بەكۆتایی هاتنی چیرۆكەكەی و ئەوكاتەی پێی ڕادەگەیەندرێت كە نەخۆشییەكەی تێپەڕاندووە.
بەشی دووەمی كتێبەكە تەرخانكراوە بۆ هێزی بیركردنەوەی ئەرێنی و چۆنییەتی بەكارهێنانی هەستی ئەرێنی بۆ بەرەنگاربوونەوە و تێپەڕاندنی شێرپەنجە، ئەم بەشە بەتەنیا كتێبێكی تایبەتە لەبواری گەشەپێدانی مرۆییدا و چێژ و سودێكی ئێكجار زۆر بە خوێنەر دەبەخشێت،
بەشی سێیەم تەرخانكراوە بۆ وتەی پزیشكانی نەخۆشخانەی هیوا، سەرنج و تێبینییەكانیان دەربارەی نەخۆشی شێرپەنجە و ڕێنمایی و ئامۆژگارییەكانیان لەو بوارەدا، بەشی چوارەمیش تەرخانكراوە بۆ چاوپێكەوتنی ئەو نەخۆشانەی هاوشێوەی نووسەر نەخۆشییەكەیان تێپەڕاندووە یان بەئیرادەوە بەرەنگاری بوونەتەوە.
هەستێكی بەهێز لەوشەكانی كتێبەكەدا بەدیدەكرێت.
ئازار هەستە، نەخۆشی هەستە، خۆشی هەستە، لەكاتی باسكردنی ناخۆشی و نەخۆشی شێرپەنجە و چارەسەر و هەموو ئەو بابەتانەی پەیوەندیدارن بەو نەخۆشییەوە لەگەڵ بیستنیدا هەستێكی ناخۆش و پڕ لەئێش و نەرێنی داتدەگرێت، چونكە لەگەڵ باسكردنیدا ئەو هەستانە بۆ خوێنەر دەگوێزرێنەوە، من سەراپا لەكاتی خوێندنەوەی كتێبەكەدا هەستم نەكرد كەسێك ئەم كتێبەی نووسیبێ خۆی تووشبووی نەخۆشیەكە بێت، چونكە هیچ كات هەستم بەبێزاری و نائومێدی و رەشبینی یان هیچ هەستێكی نەرێنی نەكرد، بەڵكوو هەمیشە هەستێكی بەهێز، پڕ لە ورە و ئیرادە، پڕ لەسەركەوتن لەم كتێبەدا ئەتدوێنێ، تەنانەت كاتێك باسی ئەوە دەكات وردەوردە قژەكانی دەوەرێت، خۆی بڕیار دەدات هەمووی بەیەكجار لاببات بۆ ئەوەی هەستی نەرێنی لەگەل وەرینی پرچیدا داینەگرێت، ئەگەر ئەم ئەوپەری ئیرادە و هێز و گەورەیی نەبێت دەبێت چی بێت، ئەمە هێزی ئیرادە و رووبەڕووبوونەوەیە، هێزێكە لەناخەوە پێت دەلێت ئەگەر پرچیشم نەبێت من بەپێوەم، بەهێزم، خۆم مووەكانی سەرم دەتاشم بەڵام رێگە نادەم ئیرادەم بوەرێت.
ئەم كتێبە هەڵگری چەندین وانەی جوانە.
فێرمان دەكات هەركات نەخۆشی و ناخۆشی، خەم و ئازار، گرفت و كێشە رووبەڕوومان بوونەوە نەپرسین چۆن و كەی و بۆ هات، بەڵكوو لەبری ئەوە بەدوای چارەسەردا بگەڕێین و كات و وزەی خۆمان بۆدۆزینەوەی چارەسەرەوە تەرخان بكەین، فێرمان دەكات بەهای ژیانمان بزانین و فێری خۆشەویستی و ئیرادە و هاوكاری و پاڵپشتیمان دەكات، ئەوەمان پێ دەڵێت كە پاڵپشتییەكان ئەگەرچی كەم و بچوكیش بن بەڵام جێی خۆیان دەگرن.
ئەم كتێبە فێرمان دەكات ژیان ئەم چركە ساتەیە، ئێستا دەتوانین داهاتوو درووست بكەین، ڕووخانی ئێستامان كاولكردنی داهاتوومانە، ئەوەمان پێدەڵێت لەناخی شێرپەنجەشدا هەناسەیەك بۆ ژیان و سەركەوتن هەیە، شێرپەنجە بەشێكی ژیانە نەك هەمووی.
ئەوەمان پێمان دەڵێت شێرپەنجە ئەزموونە هەموو كەسێك دەتوانێت سەركەوتووبێت، وەك چۆن خوێندكارێك تاقیكردنەوە دەكات و سەردەكەوێت، هێندە بەسە كۆنتڕۆڵی بیركردنەوەكانت بكەیت و ژیانت پڕبكەیت بیركردنەوەی ئەرێنی .
ئەم كتێبە ئەوەمان پیشان دەدات كاتێك ئەرێنی بیردەكەیتەوە لایەنە باشەكانی ژیان دەبینیت، ئەوكاتیش زیرەكانە مامەڵە دەكەیت و رووبەڕووی كێشەكان دەبیتەوە و ژیانت جوانتر و بەرهەمدارتر دەبێت.
ئەم كتێبە ئاگادارمان دەكاتەوە لەوەی بیركردنەوەی ئەرێنی ئەو هێزەیە كەزۆربەی خەڵكی لێی بێ ئاگان
