ڕەوڕەوەی تەمەن…
نەسرین تەنیا
شاعیر، سلێمانی
قاچەکانم لە کۆڵانەکانی
خەیاڵدانمدا
بە دیار ڕەوڕەوەی تەمەنەوە
مانیان گرتوە
نە بۆ پێشەوە ڕێ دەکەن
نە بۆ دواوە.
لە کۆڵانی جێژوان و
چاوشارکێی
پشت درەختی خۆشەویستی
کچۆڵەیەکی هار و هاچ
بۆ دیداری کوڕێکی سەرشێت
بە ئەنقەست
کاتژمێرەکەی مەچەکی
وەستاندووە و
چرکەکانی ترپەی دڵی
ئاوێتەی سترانی باڵندەکان
چاوەڕوانی هاتنە
ئەو لە ئەشقێکی هەرزەکاری و
کچۆڵەیدا ماوەتەوە
ساتەکان
لە چاوەڕوانیدا بەڕێ دەکا
بێ ئاگا لەوەی
کە قاچەکانی لە بێ تواناییدا
ڕێ ناکەن و
ڕەوڕەوی تەمەن
لە حەرەکە نەوەستاوە.
