ڕێڤان جــاف
نووسەر، هۆڵەندا
تەنيایی
هەندێ جار تەنیایی وەک مادەیەکی سڕکەر بە پێست و هەناوەوە دەگیرسێتەوە، وەک حەیوانێکی بەدکار بە مڕەیەکی دڕی وەحشیانەوە، بە هزرێکی شێتانە و زۆر بێموبالاتانەوە پەلامارت دەدات، وەک درەختێکی وشکهەڵاتوو بە جامبوونێکی تەواوەتی لە جووڵەت دەخات و ناڵەناڵی بێزاری تەوقت دەدەن، هەموو نەهامەتیيەکانی تەنیایی وەک ڕەشەبا دێتە وێزەت و داگیر و هەراسانت دەکات، ئەمانە هەرهەمووی وەک ژانێکی نەبڕاوە لە ناوەوە دەتگوشێت و ئازارت دەدات بەڵام لە ناخۆشترین ساتەکانی تەنیایشدا باشترە بە نەشئەی سۆزێکی ئارامەوە بژین، سۆزێک بۆ ژیانێکی فراوانتر و نەوەستاوتر.
بۆئەوەی تووڕەیی و خەم و پەژارە و ئارەزووە شکستخواردەکانی ئەم تەنیایییە لە خۆم دەربکەم و بتەکێنم و شوێنەواری هەر هەموویان بەتاڵ بکەمەوە، بوونی خۆم لە نادیدەوە دەربهێنم و بە ڕیتمێکی ئارام هەناسە بدەمەوە، ئارامییەک بە هەتوانێکی ساڕێژکەر بپێچرێتەوە خۆم ئەخزێنمە نێو………
خۆم ئەخزێنمە نێو پیادەکردنی هونەری بێدەنگی و بووژاندنەوەی ختووکەکانی دڵ و ویژدانەوە.
خۆم ئەخزێنمە نێو دۆزینەوەی دەروازەی سوکنایی و وێستگەکانی ئۆخژنی دڵنەوایی و هاوسەنگییەوە.
خۆم ئەخزێنمە نێو قۆستنەوەی هەل و قەرەبووکردنەوەی دەرفەتەکانی داکۆکیکاری ماف و پرسەڕەواکانەوە.
خۆم ئەخزێنمە نێو ڕێباز و جەرەیانی خزمەتکردن و پارێزەری دادپەروەرییەوە.
خۆم ئەخزێنمە نێو ئەوسەری مێژووەوە تا ئەمسەری حەقیقەتی خاکەکەم و ڕۆحییەتی نەتەوەکەم گرێبدەمەوە.
خۆم ئەخزێنمە نێو هەناسە خنکاو و تەنگەکانی مانەوە و ژێیەکانی گەرووم بە دەنگ و هاواری یەکسانی ئەلەرێنمەوە.
خۆم ئەخزێنمە نێو هەستەکانی هاوسۆزی و هاوەڵیی و بەهاناچوونی کەسە مەینەتدارەکانەوە.
خۆم ئەخزێنمە نێو بنیادنان و بەرجەستەکردنی خەونەکان و کۆکردنەوەی وزە ئەرێنیەکانی حەوانەوە.
خۆم ئەخزێنمە نێو خوێندنەوە و قووڵایی دێڕ بە دێڕی پەرتووکی کتێبخانە خامۆشەکەمەوە.
خۆم ئەخزێنمە نێو هەناسە سەرشێتەکانی بیرۆکەی نووسین و چیرۆکی ڕاز و هاوار ئەنووسمەوە.
خۆم ئەخزێنمە نێو کردنەوەی سانسۆری وشە پیرۆز و قەدەغەکراوەکانی ئازادی یەوە.
خۆم ئەخزێنمە نێو ئەفسوون و جادوویی تینوێتیيەکی پاراو نەبووەوە و کارامە و سەنگینانە پەیامە مرۆییەکان ئاراستەدەکەمەوە.
خۆم ئەخزێنمە نێو خۆشحاڵی هەنگاوە یەک بە دوا یەکەکانی پیاسە و گەڕانەوە، تۆنی نۆرە شادیيەکانی ڕەوت و دەورانی بەردەوامی ڕێک دەخەمەوە.
خۆم ئەخزێنمە نێو کەتەلۆگی ڕیزکردن و ڕێکخستنەوەی ساباتی ئەزموون و بیرەوەریی یەکانمەوە.
خۆم ئەخزێنمە نێو بەدەمەوەچوونی خواستە تۆراوەکانی خۆم و ڕەنگکردنی تابلۆکانی ژیانەوە.
خۆم ئەخزێنمە نێو ئاویار و ئاودانی گوڵە ژاکاوەکان تا تیشکی خۆر لە باخچەکەمدا بوخچەی خۆی بکاتەوە.
خۆم ئەخزێنمە نێو مەگێزە خۆشەکانی دەرزی و دروومانی عەزیيەکی شیفۆنی فەرەنسییەوە.
خۆم ئەخزێنمە نێو ئاوێنەیەکی نەحتکراوی بارۆکەوە و سووچەکانی ژوورەکەم دەڕازێنمەوە.
خۆم ئەخزێنمە نێو سۆز و میهری پەرۆشیی و زیاتر نازکێشانی منداڵەکانمەوە.
خۆم ئەخزێنمە نێو جۆشوخرۆش و پراکتیکی هەنگاوەکانەوە و سیمای ژیان و خۆشەویستی و هاوڕێیەتی دەکێشمەوە.
