تێکست
هبە فەيسەڵ
نووسەر
من قایل بووم بکرێمە قوربانی ئەو مێژووەی بە چەشنی مەمکی ژنێك، بە هێمنی نەوتیان چۆڕاندە ڕەگەکانی. ویستیان لەبری ئاوەدانی، گڕ بگرێت.
توانیم خۆم بکەمە بچوکی هەموو ئەو نەهامەتیانەی بەسەر هەڵگری نامەیەك، خاوەن باوەرێك یان خولیاگەری ژیانێك، کە مرۆڤ خۆی تێدا پێ زیاد و بێ لانە نەبینێت.
من ئارەزووم کرد قازانی پڕ وەڵامی بەردەست منداڵێك بم، تا پرسیار لە جەستەیدا نەبێتە کێچ و خەوی ئارامی لێ تێک بدات.
هەوڵم دا قەڵغانی کەللەی گەنجێك بم، تا گۆشەگیری نەچنێتەوە و سپاردنی ژیانی لە بەرزاییەکەوە بکاتە فریادڕەس.
بەڵام ئەستەم بوو تێبگەم، چۆن لێبوردن دەبێتە ڕێگەیەك بۆ دەستپێکێکی نوێ.
هەردەم سەرم دەسوڕمێ، بەردەوام گومانم لە زیندوێتی ویژدانێك هەیە کە دەیبینم چۆن لە باوێشکی قوڵیدا بێباکانە دەگەوزێ.
من و هەموو ئەو زیتەڵانەی لەسەر سفرەی بێدەنگی هەڵسابووین، خۆشەکرابوین، فێرکرابووین کە زمانمان لەگەڵ پاروە بەترسک لولدراوەکان، وەك ڕەحەتەلقومە بەشەکربوەکەی حانوتی خوێندنگە، قوت بدەین.
گەورەکان هەموو رۆژێك وەك نیيەتی ڕۆژوو، لەگەڵ دەست نوێژدا وەبیریان دەهێناینەوە، کە ئەو کەسەی پرسیاری زۆر کرد، ناوکی بێسەروشوێن کەوت. بەڵام ئەوەی ئەوان لێی بێخەبەر بوون، خەیاڵی کۆلارەئاسای مناڵێك بوو، کە هەرچەند پەتت بۆ شل بکردایە زیاتر و زیاتری دەبینی.
زیاتر و زیاتر دەیپرسی؛ تۆ بڵێی من لە جێگەیەکی نالەبار جوقابم یان جێگەیەک لە ناو مندا هێشتان نادیار؟، سەرگەردان و وێڵە؟
لەبیرمە ئەو ڕۆژەی لە چێشتەنگاودا من خەریکی کۆکردنەوەی گوێز بووم. بەنیاز بووم بیانکەم بە بۆڵێک و لە سەر درەگای داڵانەکەمان هەڵیواسم.
دەمویست میوانە ناوەختەکان ناچار بکەم، لەبری قورقوشم، ماچ بدەن لە یەخەی یەکدی.
لە ناکاو، ژاوەژاو و شپرزەیەتیيەکی تۆزاوی بێشومار گوندی هەژاند. هێندەم زانی من و براکەم کە وەک دوو گێلاس پێکەوە لکاو بووین، لە چاوتروکانێکدا لێکیان جیا کردینەوە. پشتەملی ئەو لە چنگی باوکم و منیش بە ئامێزی دایکمەوە لە پشت زیلێکی خەڕەکەشکاودا ترنجاینە کۆمەڵێك چاوی تۆقیو و بۆنی خنک و هاڵاوی هەناوی کوکوختیيەکی فلیقاوە.
هەڵتەک هەڵتەک لەگەڵ دوو قۆنەرەی لاسیکی تاکەوتاک. شیلانەیەک و چوار ئاوەڵکراسی هەڵدڕاو. هەنارێکی گەنیو و دوو بەڕووی سەوز. کەزیەکی هەڵوەشاو و دوو لێوی هەڵتەقیو. دڵ و تیرێکی کوتراو لەسەر هەورێك، جامانەیەکی قوڕاوی و گوڵوانکەیەکی سوور لەژێر پێیە تەزیوەکانی ئەو. لە تەنیشتم بۆنی وسمەی تەڕ و ڕەشاوی ئاسمان. لە سەری پەنجەکانم قەنداخێك، چەرخ و فەلەکێك، خەنەبەندانی شلێرێکی قەیرە.
من توند سەرم چەقاندە سینەی پڕ بۆنی ڕازیانە و دەستم گرت بە ڕیزبەندی سمڵی سەر گەردنی دایکمەوە. گوێم لێبوو وەک قیژەی من لەترسی سیسرکێك، چۆن سيیەکانی دایکیشم پڕبوو لەهاوارێکی نوقووم بوو بۆ خوا. نەمزانی بۆنی گەردنی دایکم بوو، یان دەنکێ زیخ کە لە پڕێکدا پەڕیيە کونی لوتم و چاوەکانمی بە فرمێسک لێڵکرد. تۆ بڵێی ئەویش لە عەزرەتی قوتار بوون، وا پەنای بردە بەر لوتی پڕ بۆگەن و تەڕی من؟ نازانم، بەڵام هێندەم بینی چۆن مام سیروانی نانەوا و مامۆستا هەڵگوردی کوردی لەو دەشتە، فوتێکراو و پەرت کەوتبوون.
من کاتێک ئەو وێنانە دێنە بەر چاوم، هەمیشە دەمهەوێت وەک پەرچەمی خۆڵەمێشیم چەپکیان بکەم و بە دەستە ئیفلیجەکانم بیانخەمە پشت گوێم. ئێستايشتاڵەکانی هێندە تیژ دەچەقنە چاوە هەنگوییەکانم، دووبارە دونیام تاڵ دەکەن. ئازاریان وەک ژانی سووڕی مانگانە هەمووجار بە گوڕتر دێتەوە. من لەو ڕۆژەوە ناتوانم فوو بە میزەڵداندا بکەم. دەترسم لەسەر لێوم ببێتە جەستەی مام شیروان و وەک زمانی مامۆستا هەڵگورد بئاوسێت. ئەوان لەسەر تەختی باوەڕیان گلابوون، منیش لە بێدەستەڵاتی و ترسی باڵقبوون. من لەو ڕۆژە نەعلەتیيەوە نەمتوانی وەک جاران دەستم تێکەڵی قژی دایکم بکەم و لە خەو بگەڕێم بمفڕێنێتە ئامێزی دڵنیایی. مەگەر قژی ئەو هێندە گرژ و ئاڵۆسکابوون، ئیدی بە هیچ تەشيیەک نە دەڕێسرا. ئێستا من لە هەموو چێشتەنگاوێك لاجانی ڕاستم ڕۆحاوی گێلاسێکی لێ ئەچۆڕێت. ڕەنگی هەڵپڕوسکاوی باوکم ئەگرم و و بۆنی نزا بێسەروشوێنەکانی دایکمم لێدێت. بەشێکی دی لە من ئاژەڵێکی کێويیە، مناڵیکی سرك و بەلەسەیە. شارێکە لە جوامێری، سەری بەرزی نێرگزێکە. دەنگی شمشاڵ و شەکری لێواری پیاڵەیەکە. لەش و لاری خەندەیەکی داگیرساوم. کچێکی دووگیانبە بۆنی ڕیشی گەرمیانیيەک. نها هەموو من، لە نووکی پێ هەتا تاکە لیرەی تەوقی سەرم، لە هەر جێیەك ناوت ببیستم، گوێیەکانم دەبنە نامەهەڵگرێکی مۆرپۆش و وەک ڕێبوارێکی شەنگ و شۆخ هەتا خۆمت پێ نەناسێنم، دەست هەڵناگرم.
کورد *
نەهامەتی *
ژیان *
بەردەوامی *
سەربەرزی *
نێرگز *
نەمری *
جەرگ و جگەر*
