کەژاڵ نوری
21-05-2016- کوردستان/ دەربەندیخان
بەراتی کە
هاتوومە بەردەرگات
بۆ کۆکردنەوەی چەند ماچێ
بەراتی کە ئەی خەزنەدار
بۆ ئەم گەدا ڕەش و ڕووتە
بۆ تۆ هەر هیچی تێناچێ
هاتوومە بەردەرگات
بۆ کۆکردنەوەی مووی ڕەشت
بەدیار دەرگاکەتەوە هەڵتروشکاوم
دەمەوێ بزانم هەڵوەرینی مووی مەچەکت
خەزان دێنێتە بەرچاوم
هاتوومە بەردەرگات
بۆ بینینی رەچەڵەکی پاییز و تۆ
ئەمەوێ لە گەڵ چیمەنەکەی بەرماڵتان بەراوردت کەم
تا بزانم موورێزان و گەڵارێزان
لای کامتان دەبن بە تابلۆ
هاتوومە بەردەرگات
تا بزانم کە ڕیشە ڕەشە تەنکەکەت
کە تەنک تەنک هاتەوە
لەگەڵ درەختەکانی شاردا،
کە گەڵایەکی تەنک تەنک دەرئەکەن
کامەتان زیاتر و زێباتر
گرەوی دڵی کچانی شار دەباتەوە
هاتوومە بەردەرگات
بەدیار گەورەبوونی تۆ و دارگوڵەکانی بەرماڵتانەوە دانیشم
تا بزانم کە پێگەشتن، کامتان زووتر و زێدەتر،
پڕدەبن لە ئاپۆرای پەپولە و هەنگ
دەمەوێ بزانم لە گەڵ پایز و زستان و بەهار و هاوینی ساڵدا
خۆرهەڵاتن لەلای کامتان پڕترە لە گورزە و شەبەنگ
هاتوومە بەردەرگات، تا بەیانی ناڕۆمەوە
دەمەوێ کە گزنگ هەستای، ببینم چۆن ریش دەتاشیت
کەی گوێزان روومەتت ئەبڕێت؟
چۆن ریباتەکەت دەبەستی و،
لە کاتی هەڵکێشانی گۆرەوییەکانتا،
کام تاکەیان بەرگەناگرێ و، وەک دڵی من
هەموو جارێ بە دەستەکانتەوە ئەدڕێت
بەراتی کە ئەی لاوەندی شازادەی مۆنارشی دڵم
لەبەردەرگات راوەستاوم بە تەمای مشتێک نوقڵم
دەی توخوا زوو وەرە دەرێ، خەریکە دەبم بە شەختە
سەرمای ئەمشەو هەرباس ناکرێ، نازانم بۆچی واسەختە؟
ئەمشەو هاتوومە بەردەرگات
ناڕۆمەوە، هەتا مووڕێزان نەبینم،
تا بەیانی دەمێنمەوە، ناڕۆمەوە
هەتا بەچاوەکانی خۆم، برینی گوێزان نەبینم
ئەی خەزنەدار، پاشای سەردار، خەزنە پڕ ماچ
بەخوا ناڕۆم، لەم بەردەرگایە ناجوڵێم
خوای ئەکرد رەق دەبمەوەو هەتا سبەی
هەرچوارپەلم دەبوو بە خاچ.
