هبە فەیسەڵ
ئاااای جەرگە گیان،
گوتت زۆرن ئەوانەی ژیان تەنها بە ئاوەژوو دەبینن..
گوتت ڕەنگە ئازایەتی مرۆڤ هەمیشە لە هەڵگیرسانی شۆڕشێک نەبێ،
بەڵکوو لە داڕشتنی نەخشەی دوو دەرکەوێت.
ڕەنگە تەمەن، ئەزموون، هەوڵ و گەیشتنی خۆت بتگەیەنێتە ئەو ئاستەی
کە هێڵی بێژنگەکەی دەستت تا دێت باریکتر و وردتربن.
بۆت دەردەکەوێت کە نەک تەنها کێت خۆش بوێت، بەڵکوو فێردەبیت چۆنت خۆش بوێت.
بوێری و ترس لە تۆدا هەمیشە دوو ڕووی یەک پولن.
ڕۆژانێک بوو خۆت لەسەر ڕۆخی دەستاڕێک دەبینیەوە.
وەک ئەو دەنکە گەنمانەی لە پڕی خۆیاندا، ملیان بە لاسک خوار کردبوو.
هێدی هێدی خەریک بوو خل دەبویتەوە بەرەو ئامێزی فەنا بوون.
خۆت لە ڕووناکی دەشاردەوە و لە سوچێکی دڵتدا کەوتبوویتە دارکاری مناڵێکی پێنج ساڵ.
کە یەکە سوکایەتیت بە خەونەکانی دەکرد.
گڕت بەردەدایە ئەو نامانەی کە بە نیازی گەیاندنیان لە کۆڵەپشتی بوکەڵەیەک حەشار درابوون.
وەلێ تۆ دەتزانی مرۆڤ ئەو کاتە دەمرێ کە بە چەشنی کاڵا ئاڵوگۆڕ بە خەونەکانی بکات.
یان کاتێک حەزەکانی لەگەڵ ئارەزوی خەڵکدا بگونجێنێت.
جا سەرت نەسوڕمێت لە مرۆڤێک کە بۆتە دومەڵێکی قوڵ ڕەگ.
مەگەر ئەویش لە ئەنجامی نینۆکێکی چەپەڵەوە لەدایک بووە.
بەڵام هەر چۆن چاو بە تاریکی ڕادێ،
ئەوهاش مرۆڤ دەتوانێ لە وردیلەکانەوە دەست بە گۆڕان بکات.
ئارەزووی گۆڕان قەبارە و خێرایی نازانێ.
پێشینان دەڵێ لەکەم کەم و لە زۆر زۆر.
ئەتوانی بە هەڵگرتنی ناز و گەڕانەوە بۆ ئەو ڕۆحە
دەست پێبکەی، کە هەموو جوانی و مانای ژیانی لێهەڵدەقوڵێت.
ئەو ڕۆحە بێگەردەی کە بریقەی لە بیلبیلە هەنگوینیەکانتەوە ئەچۆڕێت.
مەگەر تۆ نازانی ئەوانەی پاکیزەیی ژیانیان لێ ئەپڕژێت،
تایبەت و دەگمەن پەسەندکراون؟
جەرگ و جگەر
بەردەوامی
هیوا…….
جوانی…….
ڕۆحت…….
مرۆڤ…. ..
