کیژی خۆم

کیژی خۆم

هبە فەيسەڵ

شەرم مەکە چما بۆ تاریکترین قوژبن ئەگەڕێیت تا ڕازەکانی تێدا گرمۆڵە بکەی؟

بۆ چاوەکانت لە نیگا و ئەوینی مانگ گرێ ئەدەی؟

دیارە لە پەڵەی نێوچەوان و قسەی ئەم و ئەو دەترسی!

شەرم مەکە لەو لێوانەی بە داوی نەریتە گەنیوەکان هەڵچنراون

ئەو خەیاڵە گەرمانەی ئازادیان دەوێ و وەک لاشەکان حەشار دراون

شەرم مەکە لە گەواهی ئاوێنە بۆ چرچی چاوت درزی جەستە

ڕووخساری ئاوساو و لوتی پژاوت

لە ئەگریجەی چەور و لە فرمێسکا گەوزاوت

تۆ نازانی خەم زیندووە و لە دڵدا ئاوس دەبێ؟

شەرم مەکە لەو بەردانەی لەسەر لێوت وەک تاڤگە هاڕەیان دێ

لەو دەستانەی لەجێی خونچە دڕک بەدیاری دێنێ

شەرم مەکە لە خەیاڵی شەو موچووڕکە و دەستبازی

حەزی بێ کۆتایی تۆ بۆ ئەو بازنگەی ژیان بەیەک پێک نایێ هەروەک بەهار بە خونچەیەک نایێ،

شەرم مەکە گەر گوتیان شومە،

سەرخۆرە و خودای بەدکارانە ئەی نەتچێشتووە پایز، دەمێک ڕەشەبا و تاوێک بارانە؟

کیژەکەم، شەرم بەرگێکە و پڕ بە باڵات بۆت ئەچنن

تەنها هەستێکە و چواردەورت ئەیسەپێنن

بزانە، نە خونچە فەقەت بە شکانەوەی قەد سیس و

نە دەریايش بە دەمی سەگێک پیس ئەبێ

ژیان داواکردنە،

بەرەنگار بوونەوەیە و پێدانە

تاوێک سەنگەرێ سەخت و تاوێک لەنگەر هەڵدانە!

#شەرم #کیژ #مناڵ #ژن #تۆ #ژیان #جەرگ و جگەر