“”چیت داوە لە یەخەی 8ی مارس””
زێنەب یوسفی/ شاعیر/ سنە
لە ڤیترینی
ژنان
بە حوکمی چارشێوێک
ستیانەکان لەت و پەت
کراسی خەو لە کابوسێکی پیر
جلە جوانەکان لە خولیای جەستەیەکی جەواندا….
عابایەک هەمیشە
دادەخوڕێتە سەر
جانتای سەفەری ژن
و
خەونەکانی لەزەت
ڕاو دەنرێن….
ساڵگارێکە
دوکانی ژن فرۆشیەکە
ئاوەڵایە
و
مانکینی ئازادی
لە هەڵاتن….
بە تەنورەیەکی جوانیشدا
مردن دیارە….
بەسەر
جادەکانی ژندا
چەرچەفەکانی پاکیزەیی
ئاڵا ئاسا
دەشەکێنەوە
ڕوو لە ئاگر ە
چەرچەفی ناپاکیزەیی….
ئەگەر دەستی گیژوڵەکان
بلەرزێت
لە کاتی مارە بڕیندا
بەرد لە وێنەی تاوان….
گەورە
چیت داوە لە یەخەی8ی مارس
ئەگەر تەنانەت
مانکینێکی جانتا لە دەسیش
نادۆزمەوە لە جادەی ژندا…..
