گەمەی ژیان

گەمەی ژیان

فەرهاد کەریم

 

 

چوومەتە ناو سەری خۆم، لە ناو قەفەزی سەری خۆمدام،

سەر زیندانێکی بجووک و جوانە، مرۆڤ زیندانی ناو سەری خۆیەتی

لە مردن ناترسم، دوێنێ و ئەمڕۆ و دوارۆژ مردن، گرنگ و درەنگ نیە مردنم، لە ناو مردن و مردنی خۆمدا ماندوو بەدەم رێگاوە شەکر ڕشتن، خۆشە بەدەم رێگاوە شەکر بڕێژیی و هەنگوین بڵێسیەوە،

پڕم لە میهرو جوانی، راستی و ئەڤینم لێدەڕژێ، ژیان بە دوو دەست دوو پەنجەی بوگێمی بەرز کردۆتەوە دەیبینم و تێدەگەم بێ ئەوەی دەمکاتەوە، بووگێم

دەبەنگ،

نەزان،

بەتاڵ،

دۆڕاو،

مردوو

بچووک

بچووک مردن بیرخاتەوە،

خۆشە نەزانی مردووییت، لە ناو مردووان مردن خۆشە،

مردن جوانە لە ناو مردووان، شەرمی ناوێ مردن، شەرم ناکا مردن

مردن هێندە جوانە ژیان ئیرەیی پێدەبات، مردن هێندە شیرینە شەکر تاڵ

لە بیرمە ژیان جوان بوو، بەیانی و نیوەڕۆ و ئێوارە و شەوی شاد بوو،

لە ناو گەمەی ژیان داین، حەزمان بە گەمەی دۆڕانە و قەڵۆش دەرچین

لە  ناو مردووان لە گەل مردن، ژیان نابەیتەوە، خۆشە دۆڕاندن، مردنێکە و نایەیتەوە ..

بە مردن هەڵدەگەڕێین، بە مردن دێینە خوارەوە، بەردەوامییەکی جوانە، ژیان واتا نادا لە جیهانی مردوودا،

ژیان ژان دەکا

جیهان ژان دەکا

زەوی ژان دەکا

مرۆڤ ژانی ڕشت لە زەوی

تژی ژان بوو جیهان

ژیان ژانی لێدەڕژێ

جیهان نوقمی ژانە

خنکا زەوی بە ژان

ژانە مرۆڤ

مرۆڤ ژان

ژان و مردن

مردن ژان دەکا

ژان دەکا مردن

ژیان گەمەی مردن و ژان

ژان و مردن  گەمەی مرۆڤ…..