کزەی دەروون
د.مستەفا زەنگنە/ مامۆستای زانکۆ/ هەولێر
ئەم هۆنراوەیەم بۆ بەنازی کچم داناوە، کە بەکارەساتێکی تراجیدی کۆچی کرد، بۆیە داوا لەبرای خۆشەویستم، هونەرمەندی بەتواناو خاوەن دەنگێکی ناوازە،
(بورهان مەجید) دەکەم بۆی هەیە خۆی ئاوازی بۆ دابنێ و خۆیشی بیچڕێت، بەم هەوڵە لەبیرنەکراوەشی، گوزارشت لەدڵدانەوەی هەموو ئەو دایک و باوکانە دەکات کە جگەرگۆشەیان لەدەس ئەدەن، ئەم شیعرە تەنها خەمی من نییە، خەم و ڕاستیی هەست وناخی هەموو ئەو دایک وباوک و بریندارەنەیە کەتادەمرن پێوەی دەتلێنەوە. بۆیە کاتێک کاک بورهان مەجید ئەم گۆرانییە بڵێ، دڵنیام ملیۆنەها کورد کەدڵیان پڕدەبێ، دووعای خێرو داوای تەمەن درێژیی بۆ دەکەن.
کزەی دەروون
کزەی دووریی تۆ
ڕۆژی کردمە شەو
نەخەندەم ماوە
نە خۆشی نەخەو
×××
بۆهەرکوێ ئەڕۆم
وێنەت هاوڕێمە
سێبــەری بـاڵات
شەتڵی سەر ڕێمە
+++
باڵێک گەر بشکێ
گوڵێک هەڵکێشن
هەرهێندەی منن
بە خـــەم و ئێشن
×××
بۆجــارێکیش بێ
تـوخــــوا وەرەوە
دەرگای وێرانەی
پیریـــم کـەرەوە
×××
دەس دەرە بـــاڵـــم
هەست بکەم ماوی
بـــڵێی نــــەزانـــی
تۆم هەردوو چاوی!
+++
سەفەری تەنهات
نــەکـــردبـــایە
منیشت لەگەڵ
خــۆت ببردایە
×××
خۆ دوای کۆچی تۆش
هـــەتـــاکو دەمـــــرم
بـــۆ خوشک و برات
دەبێ گــوڵ بگــــرم.
