تێکست
ھبە فەیسەڵ/ نووسەر
قەدەر وابوو، من بمێنمەوە، لە دووت نەڕۆم. ئێستایش نەمزانی ئایا ژیان منی هەڵبژارد، یاخود من کوێرانە وەک منداڵێکی ساویلکە خۆمم بەکەمەریدا هەڵواسی و ڕەدووی کەتم!. کۆڵەپشتم پڕبوو لە ناوەناتۆرە لەگەڵ دوو ڕازی ئەتك کراو، کەچی هێشتا قایل نەبووم. بەسەرێکی کز و دڵێکی گەرمەوە کۆڵبەری ئەویشم هەڵگرت. قیچیسمە و کۆڵنەدەرانە بە پاڵتۆیەکی خاکی شێداری قورسەوە، وەک گەڕۆکێک بە کۆڵانە قوڕینە و تەسکەکانی مێشکم، بە جزمەیەکی هەڵتەقیوی ڕەقەوە، خێرا خێرا بە هەناسە بڕکێ ڕێم کرد، بێ ئەوەی بزانم ئەم کۆڵانە ئەمباتەوە سەر چ کەلاوەیەکی دی. خۆ ترسی من تەنها لە کەلاوە بۆگەن و خانووە ڕووخاوەکان نەبوو. بەڵکوو لەو قوژبنانە بوو کە داوێنی پیس و پشیلەی تیا زابوو. زەوییەکەی تەنها بە میزی سەگ گڵاو نەبوو. بەڵکوو پڕ بوو لە ئاژاوە و خیانەتی ئەو ماڵانەی کە تەنها بە ڕووکەش تەمیزن. من دەمزانی کە لەو قوژبنانە چەندەها هێڵنجی بێ دەستەڵاتی و ئاوەڵکراسی تەسلیم بوون دادڕابوو. جگە لە دڕکی ژەهراوی، هیچ نەمامێک لەوێ تینوێتی نەدەشکا. نازانم بۆ کەس سڵی لەم وێرانەیە نەدەکردەوە. خۆڕاگری لە حزووری ئەم وێنانەدا زێدە مەحاڵ بوو. بە جۆرێک داگیریان کردبووم، هەرچەند هەوڵم ئەدا بە هەردوو دەست چاوەکانم بگرم، هێندەی نەدەبرد گوێیەکانم بە لاوانەوەی دایکم و نوزەنوزی کەوگیرەکەی پڕ دەبوون. گێژاویک مەگەر تەنها بڵقەکانی قاچم و بیری تیژی منداڵی ئەمڕۆ، گەواهی بۆ بدەن
.#مناڵی#قەدەر#💜
