گلەییەکی شیرین
دەریا ھەڵەبچەیی/ شاعیر/ سلێمانی
بە کەس ناڵێم چۆنه هەستم
چۆن له بێ تۆیی وێرانم
ئاخر دڵم هیچ نابیستێت
گەر هەزار جار بۆی باس بکەم
که من له چیت پەشیمانم..
به کەس ناڵێم چەند بیرتەکەم
چەند پەرۆشی بینینێکتم
مەگەر ئازار ئەتوانێت که قسه بکات
ئەوکاتەی که من دڵتەنگ و
بە حەسرەتی باوەشێکتم…
بە کەس ناڵێم کە چی ڕوویدا
بۆچی تۆ دوورکەوتیتەوه
کوا خەڵک لەوە تێ دەگات
که تۆ له هیچ شتێک ناچیت
به هیچیش بیر ناچیتەوه..
بەکەس ناڵێم با هەروا بێت
زۆر شت هەیه کە ناوترێت
ئازارێک که بتسووتێنێت
باس کردنی گەمژەییه
باشتره لە خۆیدا بمرێت..
با بمێنێت وەک گلەیی
گلەییەکی ئێجگار شیرین
دەزانم کە دوای مردنم
دەزانی چەند خۆشم ویستیت
دەگریت لە بری پێکەنین..
