تۆو ئەو
د.مستەفا زەنگنە/ مامۆستای زانکۆ و نووسەر/ هەولێر
تۆ چاوم لێسوور دەکەیتەوەو
ئەویش چاوی نازم لێ دادەگرێ
تۆ بە سەدان جۆر دەمکوژیت و
ئەویش لەپێناوی منا دەمرێ
تۆ توندو تیژی و بێ بەزەیت پێوە دیارە
ئەویش تەڕو ناسک، هەربەوێنەی گوڵ هەنارێ
ئەو بۆجارێکیش ،دڵی منی نەشکاندووەو
تۆش نەک دڵ شکاندن
بەڵکو غەزەبی دنیات لێدەبارێ
تۆ، ڕێگاکانت لێ داخستووم
بۆم نییە بچمە هیچ شارێ
ئەویش ئەڵێی تاڤگەیەکە لەهەنگوینێ و
بۆ شیرینکردنی منە دکارێ
تۆ گەربۆت بکرێ
ناهێڵی دەسم بۆ دەمم بەرم
ئەویش ڕۆژانە
گەڵای سەوزی عەشقە دەیکاتە بەرم
تۆ شمشێری تیژت هەموودەم
وەک یاساوڵ،وان بەسەر سەری شیعرەکانمەوە
ئەویش شمشێری برۆی
هەربۆ جوانی،وان لەنێوان دێڕی هۆنراوەکانمەوە
تۆ دەسم دەگری ،دەمم دەگری، پێم دەخەیتە پێوەن
ئەویش دەسم لەملی خۆی دەکات و
دەمم دەخاتە نێو دەمی و
پێیەکانم دەخاتە سەر ڕێگای ژووان و گوڵستانی تەمەن
تۆ هەموو ڕۆژێ، دەزگایەکت، پێکێ خەمم پێدەنۆشێ
ئەویش هەموو شەوێ
بەئاوریشمی پرچی جەستەی شەکەتم دادەپۆشێ
تۆ، بزمارەکانت برینێک بەهەستم دەبەخشن
ئەویش لەهەموو دیداێکیدا
بە بزەیە
بەتیلەیە
یان بەماجی
کۆڵێکی نوێی، هیوام پێ دەبەخشن
