٭غەزەل٭
هونەر موکريانی/ شاعير/ مەهاباد
سەحەرێ تەڕکە دەگەڵ خونچە چڕوچاوێکی
بکەوە هەرچی سەری سۆحبەتە بەسڵاوێکی
خاو دەکشێ لەخەنەی خاسەوە سەت خۆزگە بەخۆر
خۆشە بۆ جەرگی خەڵووزم خەوەری خاوێکی
ڕێگە دژوارە مەگەر کەژ لەپی دەستی شنە بێ
سروە لەو سەیرە دەنێ سووکەڵە هەنگاوێکی
قەڵەمم چاوی لەفڕمێسکمە بۆ شيعری تەڕی
نوێ‌نەمامێکە دڵی خۆشە بە دێراوێکی
ئاە و ئاوێنە لەیەک با سووڕی غەم داپۆشن
دیارە بێ نازی ئەوین حەسرەتی داماوێکی
دڵە! دیتت لە دەمی ماچێ بەچاوی کوشتم
مەست و بێهۆشی، وەلی شاهیدی ڕووداوێکی
خامە! گەر مەتڵەبی تۆ ئەلفە هەتا یای دڵم
دامەنێ زیاد و کەمی شيعر و غەزەل واوێکی
تەڕ و تەنکی گوڵە! شاڵاوی شەماڵە و باشە
ڕانەوەستی لە سنووری هەموو سووتاوێکی
کوتی کیژۆڵەیە بەگراوی تەماکار نەبێ
بێژە پیاوێکی گەڕاوەم بەتەما لاوێکی
لانەوازێ مەلی حەز بووم و بە مەیلی زانیم
نایەوە هەر سەری موویێ لەدڵم داوێکی
من بەتۆوەم گڕی گیانێکە ئەگەر خامۆشم
وەرە دانیشە دەگەڵ گیانی هونەر تاوێکی
٤ی ره‌شه‌مه‌ی ١٤٠٣
