تێکست
ھبە فەیسەڵ/ نووسەر
تورەکەیەکی سیخناخ لە دەستی ڕاست و یەکێکی دی لە دەستی چەپم.
ئەو ڕۆژە تەماعێک سەیر دایگرت بووم. وامدەزانی قاتوقڕی شار دەگرێت و نانێک نابێت بیخۆین. نیوەی بازاڕم کردبووە ناو ئەو دوو تورەکەیەوە.
هەر لە ترێ کشمیشی، ناسکە هەرمێ، هەنجیر، هەڵوژە قایەری و قۆخی کوردی هەتا ڕۆنی خۆماڵی و پەنیری پێستە بۆ بەیانیانی جوامێرگیان. جگە لە گۆشتی نەرمە و هەندێک پەراسوو بۆ یاپراخی سبەینێ.
لەسەر لەپی دەستیشم نوسی بووم کە بستە و باسوقی حەوزە وشکەکەم بیر نەچێ.
هەرکەس دەیبینیم نیگایەکی سەیری بۆ دەکردم، وایان دەزانی خۆمم بێزو بەم هەموو خێراتەوە دەکەم. مەگەر ئەوان نازانن کە جوامێر گیان شەوانە زۆر حەزی لەو وردەخۆریەیە.
ئیدی ئەو دوو عانەیەی پورە بەدری لە پاشتێلانەکەمان کردییە پلم، هێشتا تۆزێکی لێ مابوو منیش حەزم کرد بیدەم بەو خێراتە جوانە.
هێندە خولامەوە لەم دوکان بۆ ئەو دوکان و بۆ کن مەعمیلەکەی خۆم، دەمم وشک بووبوو وەک سیپاڵ. تینوو و حەزم چوو بووە شەربەتێکی سەرسووچەکە، بە یادی سەرەتای دەستگیرانداری من و جوامێرگیان کە جارێک شەربەتێکی مێوژمان لێ هەڵقوڕاند. بەڵام هەرچەندم کرد دڵم نەهات. گۆتم دەچمە ماڵ و ئاوێک دەبێ بیخۆمەوە.
سەری پەنجەکانم هەڵئاوسا بوون خوێنیان تێدا کۆببۆوە، سوور و مۆر و خەتی سپی لە قورسی ئەو تورەکانە.
ورگێکی قورس، تورت و شۆڕ لە درزی عەباکە، بەو بایەی کە دەهات دەرپەڕی بوو. وەختا بوو میزم بچۆڕێ. ژنان دەیانگۆ مانگی خۆیەتی.
باجی بەهێی مامان لەوسەری کۆڵان منی بینی، بەرەو پیرم هات وتی “سەرت شینکەیت ئەوە دیارە ئەو زگەت لێ تەوقە. چۆن خۆتت ئەوها بارکردووە؟دەبایە ئێستا تۆ لەسەر تەختی پشت ڕاکشایتایە و دوو خزمەتکار بەدەورتا بهاتبان”.
وتم ئاخر باجی بەهێ خودا قەبووڵ ناکات، جوامێریش گوناهە لە بەیانی زووەوە چۆتە سەرکار.
هاتمە ماڵ و بەپەلە گێسکی داڵانەکەم دا و جوان ئاوەڕشێنم کرد. بۆنی خاک و گەرمی دڵانی لێدەهات. برنجی کوردی و بامێ بە ڕۆنی خۆماڵی پڕ بەدڵی جوامێر گیانم لێنابوو. جلە تەڕەکانی سبەینانێ هەڵمخست بوو، هیشک ببوونەوە وەکوو چیلکە. ئەوانیشم بەپەلە لەتەناف کردەوە و بە سەفتەکراوی بۆ جێگەی خۆیان.
خۆر ماندوو بوو هێندەی نەمابوو بکەوێ. ئاسمان سوور و زەرد تێکەڵ ببوو. جوامێریش دەرگای حەوشەی ترازاند و وەک هەموو جارێک لە ژێر لێوەوە سەلامێکی کرد. من کەوتمە سفرە ڕازاندنەوە. نان خورا و چایەکی گوڵاویم بۆ تێکرد.
لەپڕان ماندویەتییەک بێڕەحمانە دایگرتم. هەر لە ئاستی خۆمەوە سەر و شانم شۆڕکردەوە بۆ سەرینە چوکلێت ئاساکە و لەژێر لێوەوە گوتم ئەی خودای هەردوو دنیا چەندە ماندووم.
جوامێر خەندەیەکی کرد و وتی “بۆ خانم؟ خۆ بلۆکت نەکێشاوە؟”. ئیدی هێندەی نەبرد منیش سەراوم تەقی.
#ژان #💜 #جەرگوجگەر #قسەکانت #قوربانی #پەیوەندییەکان #دووگیانی
