( سەرکەوتن )
ستار ئەحمەد/ شاعیر/ کەرکووک
بمهەژێنە
چۆن تەرزە بەر دیوار دەکەوێ
باز دەدات بەرەو دوور
لێکمکەوە ، نەوەکوو بۆ بوونت
ببم بە تەڵەو تەلبەندی کلتوور
چی دەبێت بەرکی ژوان
پڕ بکەم لەنمەی بەفرو با
تەمەنت گەڵایەک ژاکاوە
رۆژێک دێت زریانێک هەر دەیبا
وەرە پێش
سەری حەز بەبسکی تێڕامان
لەهەوری دیدەنا مەکەرە لانکەڕۆ
دەزانم پێوەندی نەزاکەت
بووەتە خوناوکەی گەردنی شەوڕۆ
دواندن، بارگەی ناز لا دەباو
تەمومژ لەڕووی عەشق دەماڵێ
گەستەی دڵ، ئەمەکی بێ دڵ بێ
گومان لەگریەی کۆرپەی خەم دەئاڵێ
چەند جوانە لەنووری چاوانت
نسرمی بەیانیان ساز بکەیت
تاریکی بخەیتە چاوگی گڕەوە
دەرکەوە، خۆر نابێت لەپێچەی گەواڵە
لەگەڵ مانگ ڕێک کەون پێکەوە
دەزانم پابەندی
بەیاسای عەشق کوژو دڵبەردان
مەترسە شەو نییە بارانێک بێ نزا
نەبێتە شەهیدی بانێژەی سەرگەردان
من و تۆ
زستان و بارانین
هەوارگەو شارانین
هەر دەبێت شنەی خاک
لەبادەی هەوادا بنۆشین
هەتا کەی تا مردن
تاوانی ڕەقیبان داپۆشین
دەستی ڕاز توند بگرە
سەرکەوە بەرەو خوای دادوەریی
دەگەیتە دونیایەک بێ پەردە
نەخشاوە بەنازی شەوگاری پەریی
