شار خۆى بوو گه‌ردونى به‌سه‌ر خۆيدا رووخاند
فەرەيدون پێنجوێنی/ شاعير/ سلێمانی
شار خۆى بوو گه‌ردونى به‌سه‌ر خۆيدا رووخاند
خۆى بوو خۆى له‌سه‌ر چياوه هه‌ڵدايه خواره‌وه
كه‌وته ئابڵۆقه‌ى دوژمنه‌وه و چارى نه‌ما خۆى كوشت
خۆى بوو خۆى راوه‌شاند
بۆ پاڵاوتنى ئاو له‌ئازار
بۆ گرتنى ئازار له‌ئاو
بۆ شۆڕ كردنه‌وه‌ى ئازارى ئاو
به‌ره‌و يه‌كه‌مين ئێشه‌ڵان له‌بن مێژوودا
بۆ ده‌رهێنانه‌وه‌ى كانى
له‌ژێر داروپه‌ردووى مرۆڤى وروخاو و
شاخى رووخاو
خۆى بوو كێڵگه‌ى ژێره‌وژوور كرد
بۆ هه‌ڵڕشتنه‌وه‌ى
قارچكه گولانه‌كانى ناو گه‌ده‌ی
بۆ پووچه‌ڵكردنه‌وه‌ى ده‌ستى دوژمن
له‌ژێر پێستيا
خۆى بوو ئاسمانى به‌ردايه خواره‌وه به‌به‌رد
له‌تاو ته‌راتێن و خۆبادانى ئاگرى باڵدار
به‌ناو ساده‌يى و بێوه‌يى شينايیدا
خودايه ئيشى خۆت
به‌شارو وڵاتان
به‌دڕنده و ده‌يناسۆران
مه‌سپێره
خۆت دابه‌زه
بۆ له‌سه‌ركردنه‌وه‌ى قوربانى
بۆ ده‌مشكاندنى زۆردار
بۆ ده‌رهێنانه‌وه‌ى كێڵگه
له‌ناو بێستانى لوغمدا
بۆ شێلاندنه‌وه و تۆپه‌ڵكردنه‌وه‌ى
قوڕى ناو سكى دايك
خۆت دابه‌زه
بۆ سه‌رله‌نوێ دابه‌شكردنه‌وه‌ى
ئاو و ئاگر و خوێ به‌سه‌ر قاڕه‌كاندا
بۆ دووباره شاردنه‌وه‌ى ده‌ستى خۆت
له‌ژێر گۆره‌وى و كڵاوى فه‌قێياندا
بۆ گۆڕينى پلانى خۆت
له‌هه‌ڵدانى زه‌ويدا بۆ ناو گۆڵ
خۆت دابه‌زه
بۆ دياريكردنى چاره‌نوسى گه‌ردون
بۆ جێكرنه‌وه‌ى وڵاتى ئێمه
له‌سه‌ر پشتى خۆت
بۆ راخستن و ره‌نگكردنه‌وه‌ى كاتى ئێمه به‌سه‌ر ئاوه‌وه
خودايه خۆت وه‌ره خواره‌وه
بۆ راهێنانه‌وه‌ى به‌رخه ترساوه‌كانت
له‌سه‌ر دووباره پێگرتنه‌وه و
باعه باع و
خۆته‌ماشاكردن له T.V دا
خۆت وه‌ره خواره‌وه
بۆ به‌سه‌ركردنه‌وه و دڵدانه‌وه‌ى (شه‌ره‌فنامه)
به‌سه‌روگوێلاكى خوێناوييه‌وه
له‌ڕه‌فه‌ى خه‌سته‌خانه‌دا
بۆ چه‌پككردنه‌وه و رێكخستنه‌وه‌ى
خوشك و برا ورديله‌كان له‌ئينجانه‌دا
بۆ ده‌رهێنانه‌وه‌ى نووزه
له‌ناو ئابڵۆقه‌ى ئاگردا
بۆ ده‌ستدانه باڵى چاو
له‌ژێر بارى قورسى فرمێسكدا
خودايه خۆت وه‌ره خواره‌وه
بۆ بنياتنانه‌وه‌ى ماڵى خۆت
به‌ته‌نيشتى ماڵمانه‌وه
بۆ شه‌تڵكردنه‌وه‌ى گوێچكه‌مان له‌خاكدا
به‌ته‌نيشتى گوێچكه‌ى بنه‌چه‌ى خۆته‌وه
