گورگ و کەر

گورگ ویستی کەر تاقی بکاتەوە

گرێوی ئەقڵی لێ بباتەوە

گوتی کەرە گیان نەڵێی دەبەنگە

بەڵام بەڕاستی گیا چ ڕەنگە

کەر دایە قاقا و زەڕاندی و خەنی

بە ساویلکەیی گورگ پێ کەنی

جا گوتی ئێوە دژی مەڕانن

بەڵام دەر کەوت کاڵ و نەزانن

بەو هەمووە تین و بەو هێزە زۆرە

نازانن ڕەنگی گشت گیایەک مۆرە

گورگ دڕدۆنگ بوو واقی لێی وڕ ما

لە جوابی گوێدرێژ هەر سەری سڕ ما

گوتی ڕەنگی دیم بیستبوو بۆیە

گومانم تەواو لە جوابی تۆیە

هەر بۆیە دەبێ بۆ وەڵامی خێر

ئەو شەرعە ببەین بۆ لای مامە شێر

شێر گوێی لێ گرتن، زۆر بەبێزاری

ئەمری کرد گورگ بکرێ دارکاری

گورگە بۆر گوتی ئەمری تۆ فەڕزە

بەڵام لێت ڕوونە ڕەنگی گیا سەوزە

گوتی من بۆیە دارکاریم کردی

تاکوو دەرس بێ بە پوختی و وردی

تا لەسەر دنیای، بەڕاست یان قەستی

لەگەڵ کەرەگەل قەت داینەبەستی