گەڕان بەدوای وەڵامەکاندا
د.مستەفا زەنگنە/ نووسەر و مامۆستای زانکۆ/ هەولێر
بەدوای خەمەکانتانا مەگەڕێن
وان بەتاڵ تاڵی ڕیشاڵی دڵە چکۆڵەکەی منەوە
بەدوای ئازارەکانتانا مەگەڕێن
وان بەشوێن قامچیی جەستە سەرمابردووەکەی منەوە
بەدوای برینەکانتانا مەگەڕێن
وان بە گازەرای پشتە چەماوەکەی منەوە
لەماندوو بوونەکانتان مەگەڕێن
وان بەپێیە شەکەتە شەقاربردووەکانی منەوە
لە ناوی خائینان و دزەکان مەگەڕێن
وان بە چەرمی جانتا شڕە سەربەرزەکەی مێژووی منەوە
لە فرمێسکی وەفاداری مەگەڕێن
وان بەسەر گۆنا درزتێکەوتووەکانی منەوە
لە مێژووی نەهامەتی مەگەڕێن
وان لەپریاسکەی کرێکاری وشاگردیی سەرشانی منەوە
لە خەونە بەدی نەهاتووەکان مەگەڕێن
وان لەنێوان ئاهو حەسرەتە بێدەنگییەکانی منەوە
لە دڵشکانی ئازیزان و دۆستان مەگەڕێن
وان بە نێوچەوانی نۆمای بێ دایکی وەفای منەوە
لە بێ وەفایی دۆست نزیکەکانتان مەگەڕێن
وان بە چاک کەوای شەرم و حورمەت وبێدەنگیی منەوە
لە چاکەی دڵە باش و تاکەتاکەی مرۆڤە باشەکان مەگەڕێن
وان بە ڕاوەستانی دەس لەسەرسینگی بەردەوامی پێشوازیی منەوە.
لە حەزو ئارەزووی کێشانی دووکەڵی جگەرە مەگەڕێن
وان بە سیمای هەناسە توندی و هەناسە سواریی منەوە
لە جوانیی شیعرو پەیامی جوانی وەفاداری مەپرسن
وان بەلای هەڵوێست و دیوانی هزری بێنازی منەوە
لەخەمی ژن و بژێویی ژیان مەگەڕێن
وان بەجێی پەرپووتی خەوی شەوانەی منەوە
لەڕەنج بێوەری و بێ بەرێتیی خۆتان مەگەڕێن
وان بەکاتی دەرچوونی سبەینان و گەڕانەوەی شەوانی منەوە
لە یەک ڕێگای و عەشقی حەقیقی و گوڵی ڕۆح مەگەڕێن
وان بەنووکی قەڵەمی نووسینەکانی منەوە.
لەکێشە هەڵپەسێنراوەکانی ژیانی خۆتان مەگەڕێن
وان بەلای قسەنەکردنی کوڕەبچووکەکەی منەوە
بەدوای ژمارەی نهێنیی نێو ماڵەکانتان مەگەڕێن
وان بەڕوخساری ڕەشنووسی کتێبەکانی منەوە
خەم بۆنەبوونی ماڵ و نەبوونی مناڵ مەخۆ
وان روخساری ڕۆژانی هەژاری و تەنهایی منەوە
لە ڕێزو خۆشەویستی و پێگەی خۆتان مەگەڕێن
وان لەنێو ماندووبوونی ڕستەکانی پرۆگرامی خوێندنی نەوەکانی نەتەوەکەی منەوە.
ئەگەر دەتەوێ بزانی من چۆن دەتوانم ئەوهەموو کارەساتانە لەبیربەکەم
وەڵامی ئەم پرسیارە هابەلای قوتابییە خۆشەویستەکانی منەوە
