ڤالێنتاینا من
مەحفوز مایی/ شاعیر/ دهۆک
كو من تۆ دڤێی
نە ژبەر خالا ل گەردەنێ
نەكو دا ھەردو لێڤێن من
مینا دو شەڤرەڤینكێن خوینمێژ
دەما شەڤ ھات
بكەن لیس و
ل سەر دادەنێ
لێ پالدەنێ
كو من تۆ دڤێی
ل بن وی بەری
ل وێ بەتەنێ
….سویندا من تۆی
نەكو دا تۆ
مینا ھندەك كەچێن گوندی
ھەوار بكەی:
.. من بدەنێ
.. من بدەنێ
كو من تۆ دڤێی
نەكو دا تۆ
وان زەندێن سپی
… سپی
…سپی
مینا بەفرا سەر مەتینی
ل دزیا شەڤێ
ل دور ستویێ من وەرینی
كو من تۆ دڤێی
… ل وێ بەتەنێ
ل بن وی بەری
مینا ئاسكا چیایێ خودی
ژترسا نێچیرڤانێن بێبەخت
ل زنارا
خوە دای بن رزدە و ب بەرا
نەكو دا تۆ
نێرچیرا شەڤەكا من بی
ئەز ژی ھێدی
ل نێرچیرەك بێ ژڤاندا
ھەمبێز بكەم سینگوبەرا
كو من تۆ دڤێی
نە ژبەر وان زولف و خالا
نەژی پۆرا خەناكری
نە بۆ خاترا بەژن و بالا
نە وان برھ و نە وان چاڤا
مینا یێن ئاسكە خەزالا
كو من تۆ دڤێی
ئەڤینا من
نە مینا وێ ئەڤینێ
یا شەم و وەلی دێوانە
نە جزیری و سەلمایانە
نە زین و مەمێ ئالانە
كو من تۆ دڤێی
باش بزانە
بۆ خاترا وێ ئەڤینێ یە
یا تە خوە گوری كری
كو من تۆ دڤێی
ئەز دزانم
ئەڤینا تە كوردستانە
خوینا تە دای كوردستانێ
بەھایێ وێ نە ئەرزانە
…. پر گرانە
….. پر گرانە
