ڕێوی و زەڕافە

ڕێوی بە تین و پڕتاو هەڵدەهات
بوو بە هەرایەک وەک ڕۆژی نەهات

گوتیان چی بووە، چیت لێ قەوماوە
بۆچی تەنگاوی؟ چ شتێ ڕووی داوە؟

گوتی وا دیارە نەتانبیستووە
فەرمانی تازە لای شێر دەر چووە

شێر فەرموویەتی له پێش مردنی
چیی زەڕافەیە، بەن لە گەردنی

قاقایان کێشا، گوتیان هەی خوێڕی
تۆ کوا زەڕافەی، ڕێوییەکی هێڕی

گوتی زۆر گێلن ئێوەی جانەوەر
ئاخر شێر حوکمی داوەتە دەست کەر

کەر کە ماستاوچی و مەستی هوتافە
کەی دەکا فەرقی ڕێوی و زەڕافە؟