بۆ ئایدای ھاوژینی
ئەحمەد شاملو٫ شاعیر و ئەدیبی مەزن٫
وەرگێڕانی؛ ڕۆژا ناسر/ نووسەر/ سوید
ئەمڕۆ زۆرتر لە دوێنێ خۆشم ئەوێیت
سبەی زۆرتر لە ئەمڕۆ
ئەمە لاوازی من نییە٫ هێزی تۆیە!
کێوەکان لە بەردەکانەوە دروست بوون
مرۆڤ لە دەستپێکی ئازارەوە
من لە نیگاکانی تۆوە دروست بووم
بچوکترین خەندەی تۆ
لە هەموو بەدبەختی یەکانم ڕزگارم ئەکات
من لەگەڵ تۆدا تا ئەم ڕادەیە بە گەورەیی گەیشتووم
بۆچی غرور نەمگرێت!
من غرورێکی دەرکەوتووم! ئایدا!
دەستەکانم بۆنی ئەتڵەسی یەکانی
تۆی بە خۆوە گرتووە
وە هەموو بەرزی و نشێوی جەستەت
لەگەڵ بەرزی و نشێوییەکانی
جەستەی خۆم هەست پێ دەکەم..
چەندە بێ ئۆقرە تۆم دەوێت
بە پشتی سەمەندێکەوە
وەکو بڵێیت
نەوزینێک بێ ئۆقرەیە!
دوورکەوتنەوەش
ئەزموونێکی بێ سوودە
بۆنی جلەکانت لێرە و هێشتا..
کێوەکان لە دوورکەوتنەوەیان ساردن
دەستەکان لە کۆڵان و چەم
وجودی هاودەم٫ تۆ بەسەر زار دەهێنێت
بە بیرکردنەوە لێت
نائومێدی ڕیزی خۆی دائەنێت
تەنها بە بێ چرپەی دەستەکانت
لەهەر سەلامەتی یەک خاڵی یە جیهان!
شانەکانت ڕازیم ئەکەن
لە چەمێک کە ئەشق تینوێتی یە
زوڵاڵی شانەکانت
کە ئاوها تینوێتی ئەدات
لە چەمێک کە ئەشق ڕازی کردووە
تێبینی؛ سەمەندێک؛ سەمەند؛ پارچە ئاڵتونێکە بە پشتی ئەسپەوە.
نەوزین؛ بە ئەسپێکی تازە لەدایکبوو دەوترێت.
