ئامێزی بەسۆزی شارەکەم
عەبدوڵڵا سەڕاج/ نووسەر،/ سويد
شاری بەسۆز و شکۆمەندی کەرکوك هەمیشە ئامێزی واڵا و دڵسۆز بووە بۆ ئەو خانەوادانەی ڕوویان تێکردووە ئەگەر بۆ کار و هۆکاری کۆمەڵایەتی بوو بێت یان سیاسی . ئەڵبەتە بەندە باس لەو خانەوادانە دەکەم کە خۆم دیومن لە شاردا و دەشێت کەسانی دیکەش هەبن لەو جۆرانە .
١- لە ساڵانی چلەکانی سەدەی ڕابردوودا ڕەوانشاد شێخ ئەحمەدی بارزانی و خانەوادەی بارزانییەکان لە یەکێك لە قوتابخانەکانی جووەکان داندرا بوون لە ژێر چاودێری پۆلیسخانەی پریادی بوون کە لە قوتابخانەی دووەمی جووەکان بوون.
٢- لەو خانووەی کە بەرامبەر بە دەرگای پشتەوەی مزگەوتی نائیب بوو حکومەتی شایی ( مەلەکی) خانەوادەی حەمە ڕەشید بانەیی جێگیر کرد بوو ، کە ناپاکی دەربارەی حکومەتی کوردستان لە مەهاباد کرد بوو.
٣- خانەوادەی نوری باوڵ ئاغا پاش شۆڕشی ١٩٥٨ لە فشاری کۆمۆنستەکان ، لە گەڕەکی شاتڕلو ،کە کردبوویەتە پەناهەندەیی خۆی.
٤- لە هەمان ساڵدا ، بە هەمان هۆکار ، ئەنوەر بەگی بێتواتە پەنای بۆ شارەکەمان هێنا بوو.
بە هۆی کارکردن و دۆخی کۆمەڵایەتی چەندین خانەوادەی هەولێر و کۆیە و شەقڵاوە و بادینان لە کەرکوك نیشتەجێ بوون و دامەزرا بوون بە نمونە: دزەییەکانی وەکو هونەرمەند عومەر دزەیی و سەفینی برای کە هاوکات لەگەڵ خوێندنی مندا لە تاکە سانەویی کەرکوك بوون.
چەند خانەوادەیەکی کۆیەش لە گەڕەکی ئیمام قاسم نیشتەجێ بوون لە وانە: کاکەی حاجی مەحمود ، مامۆستا تاهیر سادق ، مامۆستا حەمید سنجاقی ، زینەتی حەمە کۆیی، عومەر دەبابە و کاکە مەم بۆتانی خوشکەزای، هەروەها جەرجیس و مەجید کۆیی و زۆری تر.
بۆ وانە وتنەوە لە قوتابخانەکانی کەرکوکدا ، چەند مامۆستایەکی کرستیانیشم لە یادە وەکو مامۆستا ئەنوەر و مامۆستا حەنای شەقڵاوەیی و مامۆستا پەترۆسی کۆیی کە لە کەرکوك وەفاتی کرد و لە گۆرستانی کلدانیەکان بە خاك سپێردرا و بەشداریمان لە ناشتنی کرد هەروەها مامۆستا ئیشۆ عەبدوڵا بازی کە خەڵکی بادینان بوو زۆر بە دڵسۆزی وانەی لە قوتابخانەی سەرکەوتن دەوتەوە.
