فیدراسیۆنی نووسەرانی کوردستان دیاسپۆرا

گۆرانیی من

گۆرانیی من

 

نوری بێخاڵی/ شاعیر/ ڕواندز

 

چش کە دەنگم ناسازە
من،
کە لە سێبەری نۆتەکان،
لەناو شەپۆلی ڕیتم و
لە قووڵایی ئاوازی گۆرانییەکەمدا دەژیم
بۆ خۆم گۆرانی دەڵێم و
لەسەر تۆنی سۆپرانۆی لێدانی دڵم،
سەما دەکەم!

نازانم لە ڕەسەنی چ درەختێکە گۆچانەکەم
کەوەت یان بەڵاڵووک
بەڵام بۆنی کوێستانی لێ دێت و
دەستی پیریی خەمەکانم دەگرێت
قیبلەنمایە،
دەمباتەوە ئەو باخچەیەی،
گەنجیم تیایدا پیاسەی دەکرد
پیاسەی ئەو ڕۆژانەی،
دەقێکی بریندارم لەناو چیمەنەکەیدا لێ بەجێما

ساڵان ڕۆیشتن
لە پاییزی تەمەندا چووبوومە خەونی باخچەکە
ناسیبوومیەوە
بە بایەکدا کە نەمزانی هی چ وەرزێکە
قەسیدەیەکی سەوزی بۆم ناردبوو

با گوتی:
باخچەکە خەونەکەی بۆم گێڕایەوە
گوایە تۆی لە خەونیدا بینیوە
یان لە وشەکانی دەقێکدا،
کە بەدوای خاوەنەکەی دەگەڕا،
ڕووخسارتی ناسیوەتەوە
ڕایسپارم بتدۆزمەوە و
بە بۆنی وشەکان ناوونیشانتم هەڵگرت

گۆرانیی من لە ڕەگی ئەو کەوەت یان بەڵاڵووک و
لە خۆڵی ئەو باخچەیەیە
دار و دارستان
با و باخ دەیناسنەوە

گۆرانیی من
سەری لەناو ڕۆژژمێراندا سپی بووە و
بەناو تونێڵی تاریکی سەردەماندا
شەکەت و ماندوو،
بە لاکەلاک،
بەڵام بە بڕست و حەوسەڵە
بە باری قورسی خەمی مرۆڤ و
خەفەتی ئەوین و
خوێنی نیشتمان هاتووە و
لەناو دۆڵی دەیجووری ژیاندا
هەر زایەڵەی دێت

قیژەیەکە لەناومدا گۆرانییەکەم
بۆم کپ ناکرێت
هاوارێکە و توند بە قورگمەوە نووساوە
بۆم قووت نادرێتەوە
دانی پێدا دەنێم،
نەیچڕم،
هەر بە زیندووێتی دەمکرۆژێت
دەستی پێوە دەگرم نەمخواتەوە

گرنگ نییە دەنگم ناسازە
خۆم لەناو گۆرانییەکەمدا دەبینمەوە
لە نۆتەکانی
لە ئاوازەکەی
لە ڕیتمی
گۆرانیێکە و بۆ خۆمی دەڵێم
بۆ خۆشەویستی
بۆ مرۆڤ

وەک گۆرانییەکەم، دەنگیشم هی خۆمە
نە ئەم لەگەڵ میزاجێکی نامۆ هەڵدەکا و
نە ئەویان لەسەر ژێی قورگێکی زڕ نووزەی دێ

وەک مەلێک کە تازە قەفەسی جێهێشتبێت
ئازاد ئازاد،
بەسەر لووتکەکاندا دەفڕم
لە شەققەی باڵەکانم دەدەم و
پڕ بە گەرووم دەچریکێنم

ئەمشەو دەیچڕم
با ئاسمان و زەوی بیژنەون،
بێدەنگیی ئەم و کڕیی ئەو، پڕ دەکەم لە هەرا
با با و دارستان گوێیان لێی بێت،
گڤەی ئەم و ورشەی ئەو، لەودا دەخنکێنم
با ڕووبار و چیا بیبیستن،
خوڕەی ئەم و خامۆشیی ئەو، لەودا دەنێژم

بۆ شەڕی فڕین
بۆ شەڕی ڕەهابوون
بۆ شەڕی مانەوە
گۆرانییەکەم هەم سەنگەرە و هەم لەمپەر
هەم نەعرەتەیە و هەم نەڕە
هەم چەکە و هەم زرێ!