رۆژانە سەد وشە دەنووسم ٩٦٤

رۆژەکە سەرمابوو، بە ”سەد وشە” خوێنەران، میوانەکانی لقی نووسەرانی هەولێر گەرم کردەوە، کتێبم کردبووە چوکلێتی ”ئەبو مونیر”ی جاران دووی بە پێنج فلوس بوو، بۆئەوەی دەمی میوانەکان شیرین بکەم.

ئێوارە هۆلەکەی شەهید ”مەهدی خۆشناو” تژی بوو لە هەولێرییەکانی کتێبیان خۆشدەوێت، ئەوانەی رۆژانە سەد وشەکەم دەخوێنەوە، ئەوانەی دوازدە بەرگی هەولێرەکەم باش دەناسن، خۆیان لەناو دەدۆزنەوە. ئەوانەی دەزانن چ سەری سپیکردم، چۆن وا دڵم گەنج ماوەتەوە.

لەو کۆڕەدا، هەموو هاتبوون بزانن چۆن رۆژانە ٢٥ سەعات دەنووسم، پاکنووسیان دەکەم، خەم لە چاپکردنیان دەخۆم!

لەسەر سەکۆکە، بەرانبەر هەمووان گوتم؛ کتێب بایەخی ماوە، نووسین حەجێکی گەورەیە، چاپکردن شۆڕشە، بڵاوکردنەوەی نوێژە! هاتم، بڵێم؛ رۆژانە سەد وشە دەنووسم.