کیژە کورد
ئەیوب ئەحمەدی تینوو کۆکەیی/ شاعیر/ بۆکان
تۆ هەناسەی بۆ ژیانم وەک هەوا پێویستمی
تۆ شەفای بۆ زامی من چەشنی دەوا پێویستمی
نیشتمانی چاوی تۆم کردۆتە ڕووگەی ئاشقی
ئەی هەوێنی شێعری تەڕ، جوانی خودا ، پێویستمی
بۆ دڕینی جەرگی شەو پێویستە تۆ پێشڕەو ببی
ڕێگە دووره و نابەڵەد چەشنی چرا پێویستمی
کیژی کورد تۆ پێشقەتاری ڕاپەڕین و غیرەتی
سەنگەرێک بۆ کۆڵنەدانی وەک چیا پێویستمی
ئەودەمەی دژ دەیهەوێ پێخووست بکا خاکی وەتەن
سات و کاتی ڕاپەڕین لەم کاتەدا پێویستمی
بۆ منی تینوو ، هەواری شێعری ئازادی گوڵم
تۆ پەناە و پشتیوانی وەک قەڵا پێویستمی
بووکی ئازادی ئەگەر پێی نایە زێدی نیشتمان
کیژی کوردی گوڵبەدەم کاتی سەما پێویستمی
12ڕێبەندانی25
