* وەرە
ڕووناک ئاڵتوون/ شاعیر/ سلێمانی
وەرە
با….بەخەتی کوفی لەدەفتەری کوردی
بنوسین ئازادو نەسرین خوشک و برا نەبوون
خەمت نەبێ ،
کەس ئێستا کوردی ناخوێنێتەوە!
* وەرە
با…لەسەر تابلۆیەکی قەراخ شار بنوسین
خۆشەویستی ھەرگیز بەرواری بەسەر ناچێ
بێخەمبە،
کەس ئێستا بۆ پشویەکیش لەقەراخ شار لانادات .
*تۆ جامانە ڕەش و سپیەکەت ببەستە
منیش کراسێکی حەوت ڕەنگ دەپۆشم
گۆرانی ( واوەتەن خەمڵیوە وەک گوڵ نەو بەھاری میللەتە…….) دەڵێین
ئەرخەیان بە کەس چەپڵە ڕێزانی نیشتمان پەروەریمان ناکا!
*وەرە
باڵێکی پەروازی من و باڵێکی ڕەنگینی تۆ
دڵێک لەئاسمان دەکێشین ،
خەیاڵت تەخت بێت کەس وەک جاران
بۆ ئەستێرەی پرشنگداری خۆی سەیری ئاسمان ناکات !
خەیاڵت ئاسودە ھاوڕێم ئیتر کەس بەنوکتەی کۆن پێناکەنێ
، کەس خۆشەویستی لا فەیروزەیی نیە، سرودێک بۆ باڵای نیشتمان ناڵێ ….کەس وەڵامی ڕۆحی زیندوو لەئاسمان وەرناگرێتەوە…کەس !!!
ڕوناک ئاڵتون
*ناو کەوانەکە سرودێکی نیشتمانیە شیعری ( زێوەری) نەمرە ..
