شیعر
محەمەد بێکەس/ شاعیر
گۆچانی پیری وا دەستی گرتووم
بەرەو دوا مەنزڵ ڕێگام گرتووە
لەمەرگ ناترسێم چونکە دەمێکە
بەخەمی هیجران دڵم مردووە
خەم ناخۆم لەبۆ عومری لەدەس چو
لەبۆزەمانی جەهێلی و جوانـــی
خۆشبەختیم نەدی ئەسەف نەمزانی
بەتامەزرۆیــــی بۆدنیــام ڕوانــی
دەبا بــڕۆم و چیتر نەبینـــم
سوتانی ناخ و میحنەتی ژیان
ئیتر بابەس بێ دوری یارانم
دەردو ڕەنجان و ناسۆری و گریان
ئەوەندەی ژیام تاوێ بەبێ خەم
سەرم نەخستە باوەشی شادی
هەرنسیبم بو ژینی بێ تۆیی و
ئاهـ و حەسرەت و هەناسەساردی
